Eron oliy rahnamosi Oyatulloh Ali Xomanaiy 28-fevral kuni mamlakatga qilingan hujumlarda halok bo‘lgani tasdiqlandi. Bu haqda Eron milliy televideniyasi ham xabar berdi.

Eron oliy rahnamosi o‘limi munosabati bilan mamlakatda 40 kunlik milliy motam va bir haftalik ta’til e’lon qilindi. Xomanaiydan tashqari Isroil va AQSh hujumlari oqibatida uning qizi, kuyovi, nabirasi va kelini ham halok bo‘lgan.

Dastlab Xomanaiyning o‘limi haqida Isroil ommaviy axborot vositalari xabar tarqatgandi. O‘shanda Eron tashqi ishlar vaziri Abbos Aroqchi bu ma’lumotni rad etgan. U oliy rahnamo va mamlakat prezidenti Mas’ud Pezeshkiyon tirik ekanini aytgan.

Shundan keyin Reuters agentligi Isroilning yuqori martabali rasmiysiga tayanib, Xomaniy o‘lganini ma’lum qildi. AQSh prezidenti Donald Tramp ham ushbu ma’lumotni tasdiqladi.

86 yoshli Oyatulloh Ali Xomanaiy 1989-yildan buyon Eronni boshqarib kelmoqda. Oliy rahbar sifatida u mamlakatda hokimiyatning barcha tarmoqlari, shuningdek, harbiy va sud tizimi ustidan eng yuqori vakolatlarga ega.

Endilikda mamlakatni Eron Prezidenti Mas’ud Pezeshkiyon, sud hokimiyati rahbari G‘olyam Husayn Mohseni-Ejei hamda Konstitutsiya posbonlari kengashi a’zosi boshqaradi. Bu haqda Eronning Tasnim agentligi xabar berdi.

Xomanaiyning maslahatchisi Muhammad Moxber hokimiyatning bunday tarzda o‘tishi Eron Konstitutsiyasining 111-moddasida belgilab qo‘yilganini ma’lum qildi.

Ma’lumot uchun, Eron Konstitutsiyasiga ko‘ra, Oliy rahbar vafot etgan yoki o‘z vazifasini bajara olmay qolgan taqdirda, yangi rahbar saylangunga qadar uning vakolatlarini yuqorida nomi keltirilgan uch kishidan iborat Muvaqqat kengash amalga oshiradi.

• AQSh
• Eron
• Havo hujumi
• Isroil