31°
Kechasi 18°
Tahririyatga navbatdagi murojaat Samarqand viloyati Tayloq tumanidan kelib tushdi.
Unda joriy yil 18-mart kuni “Tuman gaz taʼminoti” binosida sodir bo‘lgan gaz-havo aralashmasi portlashi hodisasini “Raygaz” mansabdorlari “bosdi-bosdi” qilmoqchi bo‘layotgani aytiladi.
Hodisadan 4 nafar fuqaro, 2 nafar isteʼmolchi va 2 nafar xodim jabrlangan. Ular ayni paytda tuman markaziy shifoxonasi Tez tibbiy yordam bo‘limida qolmoqda.
Eng qizig‘i, bu haqda na FVV, na “Hududgaztaʼminot” va na tegishli boshqa tashkilotlar rasmiy manbalarida xabar berilmagan. Xuddi “yopig‘liq qozonning yopiqligicha qolishi”dan ular ham manfaatdordek.
Murojaatchining bildirishicha, hodisadan ikki nafar qarindoshi – 24 va 30 yoshli yigitlar ham jabrlangan. Ulardan biriga badanining 30 foiz, ikkinchisiga esa 50 foiz kuyishi tashxisi qo‘yilgan.
Tahririyatga maʼlum bo‘lishicha, ushbu jabrlanuvchilar gazdan qarzdorligi bo‘yicha to‘lov qilish uchun 18-mart kuni “Tuman gaz taʼminoti” binosiga borgan va hodisa jabrlanuvchisiga aylanib qolishgan.
Ularning keyinchalik guvohlik berishicha, o‘sha paytda ular bino ichida gaz hidini sezishgan.
Ushbu voqeadan so‘ng jabrlanuvchilar shifoxonaga yetkazilgan va “Raygaz” rahbariyati ulardan hech qayerga shikoyat qilmasliklarini, tashkilot ularning dori-darmonlari uchun yordam berishini aytadi. Ammo oradan 4 kun o‘tsa hamki, hech kim ularning holidan xabar olmaydi.
Yong‘in chiqqan bino esa guyoki hech narsa bo‘lmaganday qayta taʼmirlab qo‘yiladi.
Shu yerda haqli savol tug‘iladi: binoning texnik xavfsizligi uchun javobgar bo‘lganlarning aybini berkitish inson hayotidan azizroqmi? O‘z ishiga masʼuliyatsiz munosabatda bo‘lishi 4 inson taqdirini o‘zgartirib yuborishi jinoyat sanalishi kerak bo‘lgan bir holatda masʼullarning ishni “yopdi-yopdi” qilishga urinishi nima deb ataladi?
Katta bir tashkilot binosi yonib ketadi, jabrlanganlar bo‘ladi va bu shifoxona qabulxonasidagi qaydnomada aks etadi, ammo hodisani na IIB va na prokuratura nazoratga oladi, shundaymi?
Xabardor.uz tahririyati “Hududgaztaʼminot” AJ, FVV hamda prokuratura organlaridan mazkur holat yuzasidan o‘rganish olib borishlarini hamda aybdorlarga nisbatan tegishlicha chora ko‘rishlarini so‘rab qoladi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
