Joriy yil 8-noyabr kuni qabul qilingan Prezident qarori bilan “Sog‘lom turmush tarzi” platformasini qayta ko‘rib chiqiladi va takomillashtiriladi. 

Qarorga muvofiq, Moliya vazirligi “Sog‘lom turmush tarzi” platformasi orqali amalga oshiriladigan to‘lovlarni 2022 yil uchun Davlat byudjeti parametrlarida nazarda tutilishini hamda 2022-yil 1-yanvardan boshlab Davlat byudjeti mablag‘lari hisobidan ularni to‘liq hajmda to‘lab berilishini ta’minlaydi.

Shuningdek, qarorda Axborot texnologiyalari va kommunikatsiyalarini rivojlantirish vazirligi Turizm va sport vazirligi bilan birgalikda aholi o‘rtasida yurish va yugurishga qiziqish tobora ortib borilayotganligini, sog‘lom turmush tarzini olib borish fuqarolarning kundalik hayotiga faol aylanayotganligini inobatga olishi zarurligi belgilangan.

Shu munosabat bilan 2022-yil 1-yanvarga qadar mazkur vazirliklarga “Sog‘lom turmush tarzi” platformasini takomillashtirish, shu jumladan, axborot dasturida fuqarolar tomonidan belgilangan masofani haqiqatda bosib o‘tganligini tasdiqlovchi mexanizmlarni qayta ko‘rib chiqish vazifasi yuklandi.

Eslatib o‘tamiz, mazkur platforma Vazirlar Mahkamasining 2021-yil 28-apreldagi “Sog‘lom turmush tarzi” platformasi faoliyatini tashkil etish chora-tadbirlari to‘g‘risida”gi qarori bilan yo‘lga qo‘yilgan va 20-may kunidan e’tiboran“Play Market” hamda “AppStore” mobil ilovalar do‘koniga “1hls” nomi ostida joylashtirilgan edi.
 

• Qaror