Toshkent shahrida qurilish jarayonlarida havo ifloslanishiga sabab bo‘ladigan omillarni oldini olish va bartaraf etish uchun huquqni muhofaza qiluvchi organlar va nazorat tashkilotlaridan 232 nafar xodim jalb etildi.

Olib borilgan chora-tadbirlar davomida 97 ta obyekt o‘rganib chiqildi.

Natijada:

– 14 ta holatda chang va qum zarrachalarining havoga ko‘tarilishini bartaraf etishga doir talablarni buzilishi;

– 9 ta holatda ifloslantiruvchi moddalarning yo‘l qo‘yiladigan doiradagi normativlardan ortiq darajada atmosfera havosiga chiqarilishiga yo‘l qo‘yilishi;

– 52 ta holatda qurilish maydonining 25 foizi ko‘kalamzorlashtirilmagani holatlari aniqlandi.

Yakunda, 6 ta obyektda suv purkagich o‘rnatildi, 12 ta obyektda avtotransport vositalari g‘ildiraklarini yuvish hovuzlari barpo etildi, salbiy holatlarni bartaraf etish bo‘yicha 14 ta yozma ko‘rsatma berildi.

Shuningdek, havo sifatiga zarar keltiradigan 4 ta obyektdagi qurilish ishlari to‘xtatildi. 47 nafar shaxs rasman ogohlantirildi, 41 nafar shaxs ma’muriy javobgarlikka tortildi.

So‘nggi kunlarda olib borilayotgan amaliy ishlar orqali havo ifloslanishi oldi olinmoqda va ushbu harakatlar ekologiya tozaligiga hissa qo‘shmoqda.

• Ekologiya
• Toshkent
• qurilish