31°
Kechasi 18°
G‘azo sektorida o‘tin terishga chiqqan ikki bola Isroil hujumi oqibatida halok bo‘ldi. CNN xabariga ko‘ra, 29-noyabr kuni ertalab bolalarning otasi Tamer Abu Assi nonushta tayyorlayotganida o‘tin tugaganini payqagan. 8 yoshli Fadi va 10 yoshli Jumaa otasi falaj va nogironlar aravachasida bo‘lgani sababli o‘tin olib kelishga ketgan, biroq qaytib kelmagan. Abu Assi dasturxon yozib, ularning qaytishini kutayotgan vaqtda yaqin atrofdagi odamlar boshpanaga yugurib kelib, ikki bola Isroil askarlari tomonidan o‘ldirilganini aytgan.
“Kafanni ochib, ularni quchoqladim. Kichkina Jujumning boshi uzilib ketgan edi, Xudo rahmat qilsin… Qo‘llari kesilgan, tanasining bir qismi yo‘q edi. Fadining esa o‘ng qo‘li va chap oyog‘i uzilgan edi”, – dedi marhum bolalarning otasi titroq ohangda.
Oila ma’lumotlariga ko‘ra, Jumaa va Fadi Bani Suheila shahrida Isroil droni hujumi oqibatida halok bo‘lgan. Isroil armiyasi o‘z bayonotida hujumni tan olib, bolalarni “sariq chiziqni kesib o‘tib, yerda shubhali harakatlar qilgan va Isroil askarlariga yaqinlashib, ularga bevosita tahdid solgan ikki shubhali shaxs”, – deb atadi.
“Isroil harbiy-havo kuchlari tahdidni bartaraf etish uchun shubhali shaxslarni yo‘q qildi”, – deyiladi xabarda.
Ma’lumot uchun, Bani Suheila “sariq chiziq”dan sharqda, G‘azo sektorida Isroil kuchlari tomonidan nazorat qilinayotgan hududda joylashgan. Hududda belgilar yetarli bo‘lmagani sababli ushbu chiziqning aniq chegarasini aniqlash qiyin.
Oktyabrdan beri o‘t ochishni to‘xtatish rejimi kuchga kirganiga qaramay, ko‘plab falastinliklar aynan ushbu ko‘rinmas chiziq yaqinida Isroil kuchlari tomonidan o‘ldirilgan.
Ikki bolaning o‘limi G‘azodagi umumiy qurbonlar soniga qo‘shildi. Falastin Sog‘liqni saqlash vazirligi ma’lumotiga ko‘ra, G‘azodagi urushda jami 70 mingdan ortiq odam halok bo‘lgan: ularning 10 mingdan ortig‘i ayollar, 20 ming nafari esa bolalar. Shuningdek, o‘t ochishni to‘xtatish boshlanganidan beri Isroil kuchlari tomonidan 350 dan ortiq falastinlik o‘ldirilgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
