16-iyul kuni O‘zbekiston bosh vaziri Abdulla Aripov hamda Osiyo Olimpiya kengashi vitse-prezidenti Otabek Umarov Chechenistonning Grozniy shahrida o‘tkazilayotgan Kavkaz investitsiya forumi doirasida hudud rahbari Ramzan Qodirov bilan uchrashdi.

Uchrashuv davomida o‘zaro do‘stlik va hamkorlik rishtalarini yanada mustahkamlash borasida suhbat qurishgan.

Mazkur uchrashuv haqida Qodirov o‘z Telegram kanalida yozgan. U o‘z postida O‘zbekiston prezidenti Shavkat Mirziyoyevni “muhtaram katta og‘a” deb atagan va yo‘llangan samimiy tilaklar uchun minnatdorchilik bildirgan.

“Chechenistonda biz O‘zbekiston bilan yaqin qardoshlik munosabatlarini yuksak qadrlaymiz va bu aloqalarni yanada mustahkamlashga intilamiz. Abdulla Nigmatovich muhtaram katta og‘amiz, O‘zbekiston prezidenti Shavkat Mirziyoyevning eng samimiy tilaklarini yetkazdi. Men Shavkat Miromonovichga iliq so‘zlar uchun minnatdorchilik bildiraman. Bosh vazir RF prezidentining yaqinda amalga oshirilgan tashrifi Rossiya va O‘zbekiston munosabatlarida yangi sahifa ochganini aytib o‘tdi. Shubhasiz, O‘zbekiston boy ma’naviy-madaniy merosga ega davlat. Biz qardosh mamlakatimiz rahbariyatining madaniy, biznes va iqtisodiy aloqalarni kengaytirishga qaratilgan qadamlarini yuksak qadrlaymiz. Ishonchim komilki, Kavkaz investitsiya forumi hududlarimiz iqtisodiyotini rivojlantirish uchun mutlaqo yangi imkoniyatlar ochadi”, — deb yozadi Ramzan Qodirov.

Shundan so‘ng, Checheniston rahbari o‘zbekistonlik mehmonlarni Grozniy xalqaro aeroportidan kuzatib qo‘ygan.

• Bosh vazir
• Chechiniston
• Ramzan Qodirov