Adliya vazirligi tizimida korrupsiyaga qarshi kurashishda bunday holatlarning oldini olish va unga sharoit yaratib berishi mumkin bo‘lgan omillarni bartaraf etishga doimiy e’tibor qaratilmoqda.

– Vazirlikning korrupsiyaga qarshi kurashish faoliyatini huquqiy va tashkiliy jihatdan takomillashtirib borish yo‘nalishida sohaga doir normativ-huquqiy hujjatlar ishlab chiqildi, – deydi Adliya vazirligi tizimida korrupsiyaga qarshi kurashish bo‘limi bosh maslahatchisi Sarvar Qobiljonov. – Doimiy ravishda o‘tkazilgan o‘rganishlar natijasida aniqlangan kamchiliklarning kelgusida oldini olish yuzasidan elektron tizimlarni takomillashtirish va raqamlashtirish bo‘yicha takliflar ishlab chiqilib, tegishli choralar ko‘rib borilmoqda.

Adliya vazirligi tizimi faoliyatidagi funksiyalar baholanib, vazirlik tizimida 419 korrupsiyaviy xavf-xatarlar aniqlandi va bu bo‘yicha tegishli xarita tasdiqlandi. Adliya vazirligi, uning tarkibiy va hududiy tuzilmalarida korrupsiyaga qarshi kurashish dasturi tasdiqlandi. 2024-yilning o‘tgan davri mobaynida vazirlik tizimidagi 6 ta adliya organi va muassasasi faoliyatida korrupsiyaga qarshi kurashish sohasiga oid qonun hujjatlariga rioya qilinishi bo‘yicha kompleks tekshiruvi o‘tkazildi.

Aholiga xizmat ko‘rsatish sohasidagi tuzilmalarda 130 ga yaqin o‘rganish, monitoring, nazorat tekshiruvlari o‘tkazildi. Qonunbuzilishi holatlariga yo‘l qo‘ygan xodimlarga nisbatan tegishli jazo choralari qo‘llanilishi ta’minlandi.

Tekshirishlar natijasiga ko‘ra, yo‘l qo‘yilgan qonunbuzilish holatlari bo‘yicha 13 nafar xodim bilan tuzilgan mehnat shartnomasi bekor qilindi. 49 nafar xodimga nisbatan intizomiy jazo chorasi qo‘llanildi. 135 nafar xodim bilan profilaktik suhbat o‘tkazildi.

Adliya organlari va muassasalarining vakant lavozimlariga talabgor nomzodlar hujjatlarini kompleks o‘rganish davomida tizimda yo‘l qo‘yilayotgan kamchiliklar va muammolar yuzasidan barcha hududiy adliya organlariga tegishli ko‘rsatmalar berildi. O‘tkazilgan tanlovlarda nomuvofiq baholangan holatlar bartaraf qilindi.

Hududiy adliya organlari va muassasalariga ichki va tashqi tanlov asosida vakant lavozimlarga hujjat topshirgan 4 ming 640 nafar nomzod bo‘yicha kompleks tekshirish o‘tkazilib, tegishli mezon talablariga nomuvofiq bo‘lgan 345 nafar nomzodning hujjatlari rad etildi.

Adliya vazirligiga aloqa kanallari orqali adliya organlari va muassasalari xodimlarining nojo‘ya xatti-harakatlari yuzasidan 140 dan ortiq murojaat va xabarlar kelib tushgan.

Mazkur murojaatlar va xabarlarni o‘rganib chiqish natijasida 44 nafar xodimga nisbatan intizomiy jazo chorasi qo‘llanildi. Jumladan 9 nafar xodim bilan tuzilgan mehnat shartnomasi bekor qilindi. Shuningdek, 112 nafar xodim bilan profilaktik suhbat o‘tkazildi.

Adliya organlari va muassasalari tomonidan 2024-yilning o‘tgan davrida 18 mingdan ziyod korrupsiyaga qarshi kurashishga oid targ‘ibot tadbirlari amalga oshirildi, mingga yaqin ko‘rgazmali materiallar tarqatildi.

Sohaga oid olib borilayotgan ishlar samaradorligini yanada oshirish maqsadida vazirlik hududiy tuzilmalar va muassasalarning korrupsiyaga qarshi kurashish jarayonlaridagi bevosita mas’uliyatini kuchaytirish, yoshlar bilan ishlash imkoniyatlarini yanada faollashtirishga e’tibor qaratish rejalashtirilgan.

• Adliya
• Murojaat