“Consumer Intelligence Research Partners” (CIRP) tahliliy agentligi tadqiqotchilari “Apple” texnologiyasi foydalanuvchilarining yosh profili tahlili haqidagi hisobotni chop etdi. Xulosa juda kutilgan bo‘lib chiqdi: “iPhone” odatda yoshlar tomonidan ko‘proq tanlanadi.

Mualliflar qancha ma’lumotni tahlil qilganiga aniqlik kiritmagan, biroq ular 2022-yilda ushbu gajetlardan kamida bittasini sotib olgan “iPhone”, “iPad” va “Mac” qurilmalarining egalarini hisobga olganliklari haqida yozishdi.

Ma’lum bo‘lishicha, o‘rtacha hisobda yangi “Apple” texnologiyasi egalarining yarmi 34 yoshdan katta emas, foydalanuvchilarning 70 foizi esa 45 yoshgacha bo‘lganlardir. Tahlilchilarning fikricha, kompaniya tomonidan ishlab chiqarilgan gadjetlarni sotib olish bo‘yicha 25-34 yoshdagilar eng faol.

Grafikda barcha turdagi “Apple” qurilmalarining mashhurligi 45 va undan katta yoshdagi tomoshabinlar orasida qanday pasayib borayotgani aniq ko‘rsatilgan. Shu bilan birga, turli xil qurilmalar o‘rtasida mashhurlikning tarqalishi minimaldir. CIRP ta’kidlashicha, bu “Apple sehri amalda” ekanini ko‘rsatadi.

Shuni ta’kidlash kerakki, ushbu maqolada yangi qurilmalarni sotib olish haqida fikr yuritilmoqda. Aksariyat hollarda smartfon yoki noutbuk sotib olinadi va eskisini oila a’zolaridan biriga o‘tishi odatiy. Shuning uchun CIRP tadqiqoti foydalanuvchilarning haqiqiy taqsimlanishini emas, balki sotib olish modellarini o‘zida aks ettiradi.

Qayd etish mumkin, 1976-yil 1-aprel kuni Stiv Jobs, Stiv Voznyak va Ronald Ueyn tomonidan asos solingan “Apple” shaxsiy va planshet kompyuterlar, audiopleyerlar, smartfonlar, dasturiy ta’minot va raqamli kontentni ishlab chiqaruvchi Amerika korporasiyasidir. Bosh qarorgohi Kaliforniya shtatining Kupertino shahrida joylashgan. “Apple”ning deyarli barcha mahsulotlari Osiyodagi zavodlarda pudratchi kompaniyalar tomonidan ishlab chiqariladi. Eng yirik pudratchi Tayvanning “Foxconn” kompaniyasi bo‘lib, eng yirik zavodi Chjenjou shahrida (Xitoy) joylashgan.

Kompaniya sotuvining yarmidan ko‘pi “iPhone”larga to‘g‘ri keladi, 2021-yilda dunyo bo‘ylab 900 millionga yaqin ana shunday smartfonlar qo‘llaniladi. Kompaniya uchun eng katta bozor AQSH bo‘lib, Xitoy, Yaponiya va bir qator Yevropa mamlakatlari daromadlarida salmoqli ulushga ega.

• Apple
• iPhone