“Green Climate Fund” Markaziy Osiyo, Janubiy Kavkaz va Pokistondagi  tog‘li hududlarda suv va qishloq xo‘jaligi tizimlarini yaxshilash uchun 250 million dollar ajratdi. Loyiha doirasida O‘zbekiston ham ishtirok etadi va Osiyo taraqqiyot banki bilan hamkorlikda amalga oshiriladi. Bank bu tashabbus uchun qo‘shimcha ravishda 3,25 milliard dollar mablag‘ yo‘naltiradi.

Dasturning asosiy maqsadi — tez eriyotgan muzliklar ta’sirida suv tanqisligi va iqlim o‘zgarishiga moslashishda qishloq xo‘jaligiga yordam berish. Loyiha doirasida suvni tejaydigan irrigatsiya tizimlarini joriy etish, yangi suv omborlari qurish va suv resurslarini boshqarishni takomillashtirish rejalashtirilgan.

Osiyo taraqqiyot bankining qishloq xo‘jaligi va tabiatni muhofaza qilish bo‘yicha direktori Yasmin Siddiqi ta’kidlashicha, “Muzliklar tez erishi — mintaqa uchun eng katta xavflardan biri. Bizga amaliy va ilmiy asoslangan yechimlar kerak. Ushbu dastur xalqlar hayoti va iqtisodiy barqarorligi uchun uzoq muddatli ta’sir ko‘rsatadi”, — dedi u.

Dastur Armaniston, Ozarbayjon, Gurjiston, Qozog‘iston, Qirg‘iziston, Pokiston, Tojikiston, Turkmaniston va O‘zbekistonni qamrab oladi. U Norin, Pyanj, Kura va Svat daryo havzalarini o‘z ichiga oladi va 13 millionga yaqin odamning turmush sifatiga ijobiy ta’sir ko‘rsatishi kutilmoqda.

• Loyiha
• Markaziy Osiyo
• Muzliklar