Italiyalik mutaxassis Fabio Kannavaro O‘zbekiston milliy jamoasi bilan shartnoma imzolab, yiliga qancha yevro ish haqi olishi haqidagi norasmiy ma’lumotlar paydo bo‘ldi.

Rossiyaning “Sport-ekspress” nashri bitimdan xabardor italiyalik manbasiga asoslanib yozishicha, 2006-yilgi jahon chempioni, mashhur murabbiy Fabio Kannavaro O‘zbekiston milliy terma jamoasi bilan bir yillik shartnoma imzoladi. 52 yoshli mutaxassisning yillik maoshi 3,5–4 million yevroni tashkil etadi. Bu summaga uning murabbiylar shtabi xarajatlari ham kiradi.

Ma’lumotlarga ko‘ra, Kannavaro dastlab Italiya yoki boshqa Yevropa davlatlaridan taklif kutgan. Uning xizmatlariga Qozog‘iston terma jamoasi ham qiziqish bildirgan, ammo mutaxassis oxir-oqibat O‘zbekiston futbol federatsiyasi shartlarini qabul qildi.

Shartnoma bir yillik muddatga tuzilgan. Agar O‘zbekiston milliy jamoa 2026-yilgi Jahon chempionati guruh bosqichida muvaffaqiyatli natijaga erishsa, Kannavaro shartnomani uzaytirish yoki Yevropaga qaytish haqida qaror qabul qiladi.

Italiya matbuoti shuningdek, Kannavaroning murabbiylar shtabiga uning 44 yoshli ukasi Paolo Kannavaro qo‘shilishi mumkinligini yozmoqda. Paolo 2024-yil noyabrida seriya S klubi “Pro Verchelli”dan iste’fo bergan edi.

Fabio Kannavaro futbol tarixidagi eng nufuzli shaxslardan biri hisoblanadi. U 2006-yilda Jahon chempionatida Italiya termasiga sardor sifatida g‘alaba keltirgan va shu yili “Oltin to‘p” sohibi bo‘lgan edi.

• Futbol
• O‘zbekiston
• UFA
• murabbiy