“Qo‘shma Shtatlar razvedkasi hozircha Rossiyaning ehtimoliy nishonlarini aniqlamagan, biroq manbalar Moskva Ukrainadagi fuqarolik obyektlariga qarshi dron hujumlarini kuchaytirishi, energetika infrastrukturasiga zarbalar berishi yoki o‘rta masofali raketalarni uchirishi mumkinligini taxmin qilmoqda”, – deb yozadi The New York Times.

Gazeta bilan suhbatlashgan rasmiylar, shuningdek, Kiyev nima sababdan “O‘rgimchak to‘ri” operatsiyasi haqida Vashingtonni oldindan xabardor qilmaganiga oid ehtimoliy sabablarni ham keltirib o‘tgan.

Ularga ko‘ra, Qo‘shma Shtatlarning Yaman husiylariga qarshi hujumlari haqida Signal messenjeri chatida yuz bergan ma’lumot sizib chiqishi AQShning operatsion xavfsizligiga bo‘lgan ishonchni zaiflashtirgan.

Yana bir sabab — Rossiyaning strategik bombardimonchi samolyotlari bo‘lib, ular yadro qurolini tashishi mumkin va bu AQSh uchun “taqiqlangan nishon” hisoblanadi. Ukrainaliklar esa o‘z rejalarini oshkor qilmagan, chunki Vashington bu rejalarga qarshi bo‘lishini bilgandi.

Yevropalik rasmiylardan birining NYTga aytishicha, Ukrainaning Rossiya aerodromlariga qilgan hujumi ittifoqchilarni o‘zlarining zaif tomonlarini qayta baholashga majbur qilgan.

“Bu hujum AQShni “Oltin gumbaz” konsepsiyasini ham qayta ko‘rib chiqishga undashi kerak. Chunki Donald Tramp tomonidan ilgari surilgan raketalarga qarshi mudofaa rejasi hozirgi shaklida bunday zarbalardan himoya qilishga qodir emas”, – deb yozadi The New York Times.

• AQSh
• Rossiya
• Ukraina
• Urush