AQSh poytaxti okrugi apellyatsiya sudi jurnalist Jamol Qoshiqchining o‘ldirilishi bo‘yicha Saudiya Arabistoni valiahd shahzodasi Muhammad bin Salmon Ol Saudga qarshi kiritilgan da’voni rad etdi. Sudya Jon Beyts shahzoda “suveren daxlsizlik” huquqiga ega ekanligi va shuning uchun jurnalistning oila a’zolari tomonidan unga qarshi berilgan da’vo rad etilishini ma’lum qildi.

Beytsning ta’kidlashicha, yaqinda prezident Jo Bayden ma’muriyati tomonidan Saudiya shahzodasiga immunitet berish bo‘yicha ko‘rsatilgan tavsiya sabab bu ishda uning qo‘lidan hech narsa kelmaydi.

Ushbu fuqaroviy da’voni rad etish to‘g‘risidagi qaror Saudiya Arabistoni taxti vorisi endi AQShga erkin kirishini anglatadi. Bu shahzodaning o‘zi kabi jinoyatda ayblangan bir qancha sheriklariga ham tegishli.

The Guardian nashrining ta’kidlashicha, agar ish yopilmaganida yoki undan ham battarroq, ya’ni shahzoda Qoshiqchi o‘ldirilishini uyushtirganlikda aybdor deb topilsa, bu AQShning moliyaviy manfaatlarini xavf ostiga qo‘ygan bo‘lardi. Vashington esa bunga yo‘l qo‘ya olmadi.

Qoshiqchining o‘ldirilishi

Ar-Riyod siyosatiga oid tanqidiy maqolalari bilan tanilgan Jamol Qoshiqchi 2017-yildan beri AQShda yashagan va u yerda The Washington Post gazetasi bilan hamkorlik qilgan. U 2018-yil 2-oktabr kuni Saudiya Arabistonining Istanbuldagi Bosh konsulligiga tashrif buyurganidan so‘ng g‘oyib bo‘lgan. Oʻsha yilning 20-oktyabrida Saudiya Arabistoni rasmiylari mojaro natijasida jurnalist diplomatik missiya binosida oʻldirilgani haqida xabar bergan edi.

2021-yil fevral oyida AQSh Milliy razvedka direktori idorasi Qoshiqchining o‘ldirilishi haqidagi hisobotni e’lon qildi. Amerika tomoniga ko‘ra, Saudiya valiahd shahzodasi operatsiyani shaxsan ma’qullagan, chunki u jurnalistni tahdid sifatida ko‘rgan.

AQSh ma’muriyati xorijdagi dissidentlarga tahdid qilgan va Qoshiqchi qotilligi ishida ishtirok etgan qirollikning 76 sub’ektiga qarshi viza sanksiyalarini e’lon qildi. Ar-Riyodda esa Vashingtonning ushbu xulosalari qat’iyan rad etildi.

• AQSh
• Muhammad bin Salmon
• Oliy sud
• Saudiya Arabistoni