Argentinalik hujumchi Serxio Aguero “Barselona”ni sudga berdi. Bu haqda AS nashri xabar berdi.

Qayd etilishicha, Aguero 2021-yil “Man Siti” bilan shartnomasi tugallangach, “Barselona”ga o‘tadi va katalonlar bilan 2-yillik shartnoma imzolaydi.

“Barselona” tarkibida hammasi bo‘lib 5 ta o‘yin o‘tkazgan futbolchi yuragidagi muammo sabab futbolchilik faoliyatini yakunlaydi.

Serxio Aguero o‘shanda klub unga birinchi mavsum uchun maoshlarni to‘lashi kerakligini ma’lum qilgandi. Hujumchi shartnomadagi ikkinchi mavsum uchun hech narsa so‘ramasligi, unga faqat birinchi mavsum uchun 3 mln yevro to‘lanishi kerakligini qo‘shimcha qilgan.

“Barselona” o‘shanda futbolchining talabiga rozi bo‘lgan, biroq bu summani sug‘urta kompaniyasi orqali futbolchiga to‘lab bermoqchi bo‘lgan.

Biroq sug‘urta kompaniyasi bu to‘lovni amalga oshirishni rad etgan. Kompaniya Aguero yuragidagi muammoni “Barsa”ga kelmasdan turib orttirganini sabab qilgan.

Shu tariqa tomonlar kelisha olishmayapti.

• Barselona