Argentina 48-daqiqada hisobni ochdi. Messi burchak to‘pini uzatganidan so‘ng Nikolas Otamendi havodagi zarba bilan gol urdi. Mazkur uchrashuv Otamendi uchun ham Argentina terma jamoasidagi so‘nggi bahs bo‘ldi.

61-daqiqada Messi Niki Pasga golli uzatma berdi. Oradan 10 daqiqa o‘tib, 39 yoshli futbolchi penaltini aniq amalga oshirib, hisobni 3:0 ko‘rinishiga keltirdi.

Uchrashuvdan so‘ng Messi terma jamoadan ketish unga og‘ir bo‘lishini aytdi. TyC Sports uning so‘zlarini keltirgan.

“Bugun nimadir deyish qiyin. Hissiyotlarga to‘lib ketganman, xayolimda juda ko‘p fikrlar aylanyapti. Birinchi bo‘lib otam xayolimga keldi.

Men qila oladigan yagona narsa – xayrlashuv nutqimda aytganimdek, barchaga minnatdorchilik bildirish. Bu futbolkani 20 yildan ortiq kiyish men uchun katta sharaf bo‘ldi. Hatto eng qiyin paytlarda ham kurashishdan to‘xtamadim, doimo bor kuchimni sarfladim. Terma jamoadan ketish men uchun juda og‘ir bo‘ladi. Qasam ichamanki, bu yerga abadiy kelishni istardim. Chunki Argentina terma jamoasida o‘ynash – insonning boshidan kechirishi mumkin bo‘lgan eng yaxshi narsa”, dedi Messi.

Futbolchi, shuningdek, Argentina terma jamoasini tanqid qilganlar haqida ham fikr bildirdi. U jamoaning muvaffaqiyatsizligini istaydiganlar borligini ta’kidlab, 2022-yilgi jahon chempionatidagi g‘alabani muxlislar bilan nishonlaganini yodga oldi.

Messi Argentina terma jamoasidagi debyutini 2005-yilda o‘tkazgan. U faoliyati davomida 208 ta uchrashuvda 126 ta gol urib, 68 ta golli uzatma amalga oshirgan. Messi Argentina bilan jahon chempionati, ikki marta Amerika Kubogi, Finalissima va 2008-yilgi Pekin Olimpiadasida oltin medalni qo‘lga kiritgan.

Shu tariqa, Messi Argentina terma jamoasi safidagi faoliyatini o‘yinlar, gollar va golli uzatmalar bo‘yicha rekordchi sifatida yakunladi.