Ushbu loyihaga O‘zbekiston va Jahon banki tomonidan start berildi.

Samarqandda o‘tgan iqlim forumida Ekologiya vazirligi va Jahon banki “O‘zbekistonda barqaror landshaftlarni tiklash” loyihasiga start berdi. Ta’kidlanishicha, uni moliyalashtirish uchun 153 mln dollar ajratiladi. Maqsad esa degradatsiyaga uchragan hududlarda o‘rmonlar maydonini ko‘paytirish va yashash sharoitlarini yaxshilashdir.

Loyiha 6 ta hudud — Jizzax, Qashqadaryo, Namangan, Samarqand, Surxondaryo va Sirdaryo viloyatlarini qamrab oladi. U degradatsiyaga uchragan yerlarni tiklash, mahalliy landshaftlarning barqarorligini oshirish, ekoturizmni rivojlantirish va kichik biznesni qo‘llab-quvvatlashga qaratilgan.

Loyihani amalga oshirish, shu jumladan, quyidagi tadbirlar uchun Ekologiya vazirligi huzuridagi O‘rmon xo‘jaligi agentligi mas’ul hisoblanadi:

– respublikaning 6 ta viloyatida degradatsiyaga uchragan yerlarni daraxtlardan (agroo‘rmon xo‘jaligi, o‘rmon plantatsiyalari, bog‘lar, o‘rmon-yaylov tizimlari) tiklash bo‘yicha ishlarni amalga oshirish (ushbu faoliyat, shuningdek, o‘rmonlarni qayta tiklash va ko‘kalamzorlashtirish kabi landshaftni tiklash faoliyati bilan shug‘ullanadigan mahalliy aholi uchun qisqa muddatli ish o‘rinlarini yaratadi);

– tabiiy resurslardan samaraliroq foydalanish asosida kichik va o‘rta korxonalarni rivojlantirish uchun fermerlarga moliyaviy va ta’lim sohasida yordam ko‘rsatish;

– muhofaza etiladigan tabiiy hududlar va o‘rmon qo‘riqxonalarini boshqarishni takomillashtirish va 6 ta hududda barqaror ekoturizmni rivojlantirish (loyiha zarur infratuzilmani, jumladan, muhofaza etiladigan tabiiy hududlar va o‘rmon hududlarida turistik markazlar, ma’muriy obyektlar, kempinglar, sayr qilish joylari, sayyohlik marshrutlari va boshqa rekreatsion maydonlarni yaratishni moliyalashtiradi);

– O‘zbekistonda birinchi bo‘lib o‘rmon plantatsiyalari bo‘yicha yagona ma’lumotlar bazasini va O‘rmon xo‘jaligi agentligi uchun axborot-kommunikatsiya platformasini yaratish.

Ekologiya vaziri Aziz Abduhakimovning so‘zlariga ko‘ra, degradatsiyaga uchragan yerlarga daraxt ekish landshaftlarning barqarorligini oshiradi, yashash sharoitlarini yaxshilaydi va ish o‘rinlarini yaratadi.

“Biz bugun Jahon banki bilan hamkorlikda yo‘lga qo‘yayotgan loyihamiz O‘zbekiston o‘rmon xo‘jaligi tizimini 2030 yilgacha rivojlantirish konsepsiyasida belgilangan maqsadlarga erishishga yordam beradi. Bu o‘n yillik oxiriga qadar o‘rmonlar maydonini 6,1 mln gektarga yetkazish masalalarini ham o‘z ichiga oladi”, — deydi Ekologiya vaziri.

Jahon bankining Markaziy Osiyo bo‘yicha mintaqaviy direktori Tatyana Proskuryakova yangi loyiha O‘zbekistonga shahar va qishloqlarda iqlim o‘zgarishiga chidamlilikni oshirishga qaratilgan RESILAND CA+ (Markaziy Osiyoda barqaror landshaftlarni tiklash) dasturida ishtirok etish imkonini berishini ta’kidlagan.

• Bitim
• Loyiha
• Samarqand
• sammit