Amerikalik pop-xonanda Beyonse, uning turmush o‘rtog‘i Jay-Z, reper Big Freedia hamda Sony Music ovoz yozish studiyasi xorijda birinchi raqamli xitga aylangan “Break My Soul” nomli qo‘shig‘i mualliflik huquqini buzganlikda ayblanmoqda.

Mazkur tarona Beyonsening 2022-yil iyul oyida chiqqan yettinchi albomidan o‘rin olgan. Unda Big Freedia tomonidan 2014-yilda chiqarilgan “Explode” qo‘shig‘i so‘zlari va o‘xshash musiqiy ohang mavjud. Da Showstoppaz guruhining da’vo qilishicha, qo‘shiqda 2002-yilda chiqqan “Release a Wiggle” trekidan parcha o‘g‘irlangan. Amerikalik rep qo‘shiqchisi Big Freedia qo‘shiqdagi parchadan noqonuniy foydalangan.

Big Freedia va Beyonse mualliflik huquqlarini buzgani haqida xabardor qilingan, ammo xonandalar litsenziya olishdan bosh tortgan. Endilikda Da Showstoppaz guruhi ularni hammuallif sifatida ro‘yxatga olish, yetkazilgan zararni qoplash, shuningdek, qo‘shiqdan keladigan keyingi daromadning bir qismini o‘tkazishni talab qilmoqda.

Guruh a’zolarining so‘zlariga ko‘ra, Beyonse va boshqalar bir nechta mukofotlar va katta daromad olgan bo‘lsa-da, Da Showstoppaz hech qanday e’tirof, mukofot va biror moddiy manfaat olmagan.

• Shou-biznes