Kecha, 15-oktyabr kuni BAA ustidan qozonilgan g‘alabadan so‘ng O‘zbekiston milliy terma jamoasi futbolchisi Otabek Shukurov o‘yindan keyingi matbuot anjumanida ishtirok etdi.

“Og‘irroq o‘yin bo‘ldi. JCh saralashida oson o‘yinning o‘zi yo‘q. Ko‘p vaziyatlar yaratyapmiz, ammo vaziyatlardan foydalana olmayapmiz. Muhimi, uch ochkoni qo‘lga kiritdik. Muxlislarga rahmat aytaman, bizni qo‘llab-quvvatlashda davom etinglar. Biz Jahon chempionatiga chiqamiz”, – dedi u.

Shuningdek, terma jamoa yetakchisi muxlislarning tanqidlariga ham javob berdi.

“Forslar dunyo reytingida 20-o‘rinda, biz esa 61-o‘rindamiz. Ular bir kishi kam bo‘lib qoldi to‘g‘ri, ammo bu Eron. O‘yin so‘ngida Eron penalti ishlagan bo‘lishi mumkin, ammo ular qizil kartochkaga qadar ham darvozamizga gol ura olishmadi.

Eron har doim mundialda ishtirok etgan jamoa. Biz ham vaziyatlar yaratdik, Eron ham so‘nggi daqiqalarda xavfli vaziyatlarga ega bo‘ldi. So‘nggi uch uchrashuvda Eron bizni mag‘lub eta oldimi? Hozirgi vaqtda bizni ko‘pchilik “mazmunsiz” o‘yin deb tanqid qilishmoqda.

Biroq biz avvallari juda qiziqarli va yorqin futbol namoyish etib, mundialsiz qolib ketganmiz. Futbolchi sifatida jurnalistlar terma jamoani faqatgina tanqid qilishayotgandek tuyulmoqda. Biz faqatgina natija uchun o‘ynayapmiz.

Mening faoliyatimdagi eng alamli o‘yinlar bu mehmondagi Saudiyaga qarshi yirik hisobdagi mag‘lub bo‘lgan o‘yinimiz va 2017-yildagi Janubiy Koreyaga qarshi golsiz durang. Ikki bahsdan so‘ng ham biz Jahon chempionatisiz qolib ketgandek.

Biz Eronni qochirib yubormayapmiz. Muhimi shu. Biz ayni vaqtda guruhda yetakchimiz. Iltimos, ushbu natijalarimizni ham qadrlaylik”, – dedi Shukurov.

Ma’lumot uchun, O‘zbekiston terma jamoasi o‘z guruhida 10 ochko to‘plagan holda Eron bilan “qo‘shhokimlik” qilmoqda.

• Futbol
• Jahon chempionati