O‘zbekistonga yangi turdagi sintetik giyohvandlik vositasi — “klefedron”ni olib kirishga urinish bojxonachilar tomonidan to‘xtatildi.

Ma’lumotlarga ko‘ra, 31 yoshli taksi haydovchisi notanish shaxslardan 2 dona “reduktor” avto ehtiyot qismini 200 dollar evaziga qabul qilib, “Navoiy” chegara bojxona postiga yetkazib bergan. Reduktorlarni post orqali o‘tkazish uchun esa 1989-yilda tug‘ilgan fuqaroni 150 ming so‘mga jalb etgan.

Tovarlar nazorat-rentgen qurilmasida shubhali aks etgani bois, ular belgilangan tartibda ko‘zdan kechirilgan. Natijada har bir reduktor ichiga 3 tadan, jami 6 ta o‘ram yashirilgani aniqlandi. Ekspertizaga ko‘ra, o‘ramlardan salkam 5 kilogramm “klefedron” sintetik giyohvandlik moddasi chiqqan.

Tezkor tadbir doirasida ehtiyot qismlarini qabul qilib, zanjirning so‘nggi bo‘g‘iniga yetkazishi kerak bo‘lgan kuryer ham Toshkent shahrining Yashnobod tumanida qo‘lga olingan. Kuryer 2 ta telefon raqami orqali “Vitaliy” deb tanishtirilgan shaxsning ko‘rsatmasiga binoan moddalarni ikki nafar fuqaroga topshirishi kerak bo‘lgan. Ular “tovar”ni poytaxtdagi 5 ta manzilga tarqatishni rejalashtirgan.

Ayniqsa, taksi haydovchisi, tashmachi va kuryer ehtiyot qismlari ichida sintetik modda borligidan bexabar bo‘lgani ma’lum qilindi. Ammo bu holat ularni javobgarlikdan ozod etmaydi.

Prezidentning 3-noyabrdagi farmoniga muvofiq, uyushgan guruh tomonidan giyohvandlik vositalarini transchegaraviy tarzda o‘tkazish uchun 20 yilgacha ozodlikdan mahrum qilish jazosi belgilanmoqda.

Hodisa yuzasidan Jinoyat Kodeksining 246- va 273-moddalari bilan jinoyat ishi qo‘zg‘atilgan.

• Bojxona
• Giyohvandlik
• Jinoyat