“Chexiyaga ishlash maqsadida kelgan, biroq ayrim huquqiy muammo va moliyaviy sabablarga ko‘ra, murakkab vaziyatga tushib qolgan yurtdoshimiz diplomatik vakolatxona ko‘magida vatanga qaytarildi”, – deb xabar qilmoqda “Dunyo” agentligi.

O‘zbekistonlik fuqaro Sh.N. Chexiyaga mehnat qilish maqsadida borgach, xorijga chiqish pasportini o‘g‘irlatib qo‘yadi. Natijada, ishlash uchun kerakli hujjatlarni o‘z vaqtida rasmiylashtirmagani sababli, noqonuniy maqomga o‘tib qolgan. U bunga e’tibor qilmasdan, shu tariqa yashab, ishlab kelgan. O‘zbekistonga qaytish payti kelganda esa yangi hujjatni qayerdan olish mumkinligi hamda vatanga qanday tartibda qaytishni bilmagan.

Pasportsiz qolgani, Chexiya Respublikasida qonuniy yashash hamda ishlash uchun hujjat rasmiylashtirishning murakkabligi sababli Sh.N. og‘ir ijtimoiy ahvolga tushib qolgan. U mushkul vaziyatini hal etish maqsadida O‘zbekistonning Chexiyadagi elchixonasi konsullik bo‘limiga yordam so‘rab murojaat qilgan.

O‘zbekiston diplomatik missiyasi ushbu holat yuzasidan darhol choralar ko‘rib, fuqaroga amaliy va huquqiy yordam ko‘rsatish maqsadida Praga shahridagi Xalqaro migratsiya tashkiloti (IOM) bilan muzokara olib boradi. Sh.N.ga vatanga qaytish guvohnomasi rasmiylashtirilib, 3-mart kuni uning O‘zbekistonga qaytishiga koʻmaklashilgan.

• Chexiya
• Elchixona
• O‘zbekistonlik
• fuqaro