Ispaniyalik tajribali mutaxassis Xose Mariya Mendes O‘zbekiston futzal terma jamoasining yangi bosh murabbiyi etib tayinlandi. Bu haqda O‘zbekiston futzal assotsiatsiyasi ma’lum qildi.

Xabarga ko‘ra, tashkilot hamda ispaniyalik murabbiy o‘rtasida ikki yillik shartnoma imzolangan.

“52 yoshli mutaxassis o‘zbekistonlik futzal ishqibozlariga yaxshi tanish. U avval ham ikki bor milliy terma jamoamizni boshqargan: 2011–2012 hamda 2014–2017-yillarda. Mendes rahbarligida O‘zbekiston terma jamoasi 2014-yilgi Osiyo chempionatida bronza, 2016-yilda esa kumush medalni qo‘lga kiritgan”, – deyiladi xabarda.

Xose Mariya Mendes boshqaruvida O‘zbekiston futzal terma jamoasi 2016-yilgi Osiyo Kubogida finalga qadar yetib borib, o‘z tarixida ilk bor Jahon chempionatida ishtirok etgan.

Murabbiy 1974-yil 28-mart kuni Ispaniyaning Lugo shahrida tavallud topgan. U futzalchilik faoliyatini “Lugo” va “Autos Lobelle” klublarida darvozabon sifatida boshlagan. 1996-yilda klub bosh murabbiyi iste’foga chiqarilgach, rahbariyat ushbu lavozimni Mendesga taklif qiladi. Shu tariqa, u 22 yoshida murabbiylik faoliyatini boshlagan.

Mendes milliy jamoalar bilan ishlash tajribasiga ham ega. U 2008–2009-yillarda Tailand, 2010-yilda esa Vyetnam terma jamoasini boshqargan. Mutaxassis milliy jamoa bilan bir qatorda 2016–2017-yillarda mamlakat chempioni “Ardus” klubida ham ishlagan.

Xabar qilinishicha, Mendes O‘zbekiston yoshlar futzal terma jamoasining shakllanishida muhim rol o‘ynab, bir qator iqtidorli futzalchilarni kashf etgan. 2019–2026-yillar davomida esa Mendes yana Tailandda faoliyat olib bordi. Murabbiylik faoliyati davomida u Osiyo Kubogi vitse-chempioni, bronza medali sovrindori, shuningdek, klublar o‘rtasidagi Osiyo chempionati hamda Osiyo kubok egalari kubogi g‘olibi bo‘lgan.

• Futzal
• Tayinlov
• UFA
• murabbiy