“Toshkent-Aero” ixtisoslashtirilgan bojxona kompleksi tezkor tuzilmalari tomonidan giyohvandlik vositalarining noqonuniy olib kirilishi va ichki hududdagi yashirin aylanmasiga qarshi navbatdagi tezkor tadbirlar o‘tkazildi.

Poytaxt aeroportida Bishkekdan uchib kelgan qo‘shni davlat fuqarosi bojxonadan “yashil” yo‘lak orqali harakatlanib, jomadonida sintetik giyohvandlik vositalarini olib kirishga uringani fosh qilindi.

Go‘yoki sport ozuqasi tarzida olib o‘tilayotgan 2 ta qutidagi 684 dona kapsula tarkibida 560,75 gr “alfa-PVP” sintetik giyohvandlik moddasi mavjudligi aniqlangan.

Shundan so‘ng mazkur narkojinoyatning ildiziga yetib borish maqsadida kompleksning Kontrabandaga qarshi kurashish sho‘basi tomonidan davlat xavfsizlik xizmati va ichki ishlar idoralari vakillarini jalb qilgan holda Toshkent shahrida tezkor tadbir o‘tkaziladi.

Ya’ni, xorijdan olib kirilgan 560,75 gr “alfa-PVP” sintetik giyohvandlik moddasini qabul qilib olishi kerak bo‘lgan shaxs ham Bektemir tumanida qo‘lga olingan.

Ushbu shaxsning xonadoni belgilangan tartibda ko‘zdan kechirilganida, bu yerda 114 dona kapsulada taxminan 80 gr og‘irlikdagi “ALFA-PVP” sintetik giyohvandlik moddasi va ularni tarqatish uchun hozirlangan 37 dona o‘ramchalar, 2 gr og‘irlikdagi “marixuana”, 2 dona o‘ramda 30 gr og‘irlikda boshqa turdagi sintetik narkotik modda, 4 dona elektron tarozi, “izolenta”lar va zip paketlar mavjudligi aniqlanib, daliliy ashyo tariqasida olingan.

Shuningdek, “Toshkent-Aero” IBK Kontrabandaga qarshi kurashish sho‘basi tomonidan Surxondaryo viloyati bojxona boshqarmasi va Davlat xavfsizlik xizmati bilan hamkorlikda Sariosiyo tumanida navbatdagi tezkor tadbir o‘tkazildi.

Tezkor tadbirda avvaldan kuzatuvga olingan shaxs yonidagi 14 dona o‘ramga joylangan 14 kg 680 gr og‘irlikdagi “opiy” giyohvandlik vositasini 180 ming AQSh dollariga sotayotgan vaqtida qo‘lga olingan.

Hozirda har ikkala holat yuzasidan bojxona organlari tomonidan jinoyat ishlari qo‘zg‘atilgan.

Eslatib o‘tamiz, respublika bojxonachilari tomonidan yil boshidan buyon aniqlangan 171 ta holatda 383 kg.dan ziyod giyohvandlik vositalarining bojxona chegaralari orqali olib o‘tilishi va ichki hududdagi yashirin aylanmasiga chek qo‘yilgan.

• Aeroport
• Giyohvandlik
• Jinoyat
• Surxondaryo
• Toshkent