Oliy ta’lim, fan va innovasiyalar vaziri Ibrohim Abdurahmonov O‘zbekistonda ishga joylanmagan bitiruvchilari soni ko‘p bo‘lgan OTM sifatsiz ta’lim berayotgan muassasa deb topilib, bunday OTMlarning faoliyatini tugatish masalasi ko‘rib chiqilishini aytgani xabar berilgan edi.

Sobiq deputat Rasul Kusherbayev vazirning ushbu fikriga munosabat bildirib, mantiq va qonun chegarasiga to‘g‘ri kelmaydigan harakatlar uzviy davom etayotganini qayd etgan.

“Bu normal jamiyat vaziri emas, “avtoritar rejim”ga xos jamiyat mulozimining tahdidi. Yangi vazirimiz ham avtokratiya yo‘lidan ketmoqda.

Darvoqe, nimalar deyapsan, haddingdan oshma deguvchi akalar: qancha xaspo‘shlamaylik bizni shundoq ham “avtoritar rejim”li davlatlar qatoriga qo‘shib qo‘yishgan. Buning asosiy sababi real ish qolib, ko‘p sohada xo‘jako‘rsinga ishlash, kattalarga “paxta qo‘yish” bilan vaqt o‘tkazayotganimiz.

To‘g‘risi men birorta ham normativ huquqiy hujjatda OTMlar bitiruvchilarni ishga joylashtirishga majburligi haqida qoidani ko‘rmaganman. OTM vazifasi sifatli ta’lim berish va agar tegishli ta’lim darajaga ega bo‘lsa bitiruvchiga diplom tutqazish. Tamom vassalom!

Qiziq: horijdagi nufuzli OTMlar masalan, Garvard, Oksfor, Kembridj kabilarga ham shunday talablar qo‘yilganmikan? Ular qanaqa vazirlarning talablaridan kelib chiqib shunday natijalarga erishgan? Bu savollar janob vazirga.

Bir narsa oydinlashib bormoqda: bu ketishda O‘zbekistonda birorta ham OTM yaqin orada top-500 talikka kirmasa kerak”, – deydi Kusherbayev.

• OTM
• Oliy ta'lim, fan va innovatsiyalar vazirligi
• Rasul Kusherbayev