“Bunyodkor” futbol klubi bosh murabbiy o‘zgardi. Mazkur o‘zgarish klub prezidenti Mehriddin Abdullayev ishtirokidagi majlisda maʼlum qilingan.

Qayd etilishicha, “Bunyodkor” klubi tarixida Superliganing 6-turi doirasida “Olimpik”ka yutqazib, o‘z maydonidagi eng yirik hisobdagi mag‘lubiyatga uchragani (1:5)dan so‘ng klub rahbariyati murabbiylar shtabi oldiga “Navbahor”ga qarshi navbatdagi bahsda g‘alaba qozonish vazifasini qo‘ygan edi. Ammo “qaldirg‘ochlar” Namanganda mag‘lubiyatga uchrab qaytgan.

Navbatdagi mag‘lubiyatda “munosib qarshilik ko‘rsata olganlari” sabab klubning murabbiylar shtabiga yana imkoniyat berilgan. Biroq, kecha, 10 may kuni Superliganing 8-turida “Metallurg” jamoasi bilan kuch sinashgan “Bunyodkor” yana muhim ochkolarni boy berdi. Ushbu uchrashuvdan so‘ng klub rahbariyati tomonidan murabbiylar shtabida o‘zgarishlar amalga oshirish bo‘yicha qaror qabul qilingan.

– “Bunyodkor”ning obro‘siga bu aslo yarashmaydi. Men murabbiy va futbolchilardan shuni so‘rardim va istardimki, har biringiz har safar o‘yinga chiqqaningizda fidoyilik ko‘rsatib, ijobiy natija uchun joningizni berib kurashing. Faqat shundagina zafar quchish mumkin. Jamoaning hozirgi holati esa qoniqarli darajada emas, – deydi klub prezidenti Mehriddin Abdullayev.

Shundan so‘ng “Bunyodkor” murabbiylar shtabida bir qator o‘zgarishlar amalga oshirildi. Jumladan, bosh murabbiy Shuhrat Maqsudov, murabbiy Aram Ananyan va darvozabonlar murabbiyi Abdusattor Rahimov o‘z lavozimlarini tark etishlari eʼlon qilindi.

Shu kunga qadar bosh murabbiy assistenti bo‘lib ishlab kelgan Viktor Karpenko bosh murabbiy vazifasini bajaruvchi etib tayinlandi.

Anvar G‘ofurov bosh murabbiy assistenti lavozimiga o‘tkaziladigan bo‘ldi. Ruminiyalik Avgustin Chirita esa jismoniy tayyorgarlik bo‘yicha murabbiy sifatida ishini davom ettiradi.

Murabbiylar shtabidagi bo‘sh o‘rinlarga nomzodlarni ko‘rib chiqish Viktor Karpenko zimmasiga yuklatildi. Viktor Aleksandrovich tez kunlarda klub rahbariyatiga bu boradagi o‘z takliflarini kiritishi lozimligi taʼkidlandi.

• Bunyodkor
• Tayinlov