Farg‘ona viloyatining Buvayda tumanida hokim o‘rinbosari ekologiya inspektoriga kuch ishlatdi. Ma’lumotlarga ko‘ra, Ekologiya qo‘mitasi inspektori Ahrorjon Niyozov aholi murojaati asosida holat joyiga borib, noqonuniy daraxt kesilishini aniqlagan va holatni rasmiylashtirmoqchi bo‘lgan.

Ammo uning qonuniy faoliyatiga tuman hokimi o‘rinbosari Sayidjon Xidirov tomonidan zo‘ravonlik yo‘li bilan qarshilik qilingan. Guvohlarning aytishicha, vazifasini bajarayotgan inspektor avval asossiz kaltaklangan, keyin esa milliy gvardiya va IIB xodimlari yordamida kuch bilan hududdan olib chiqilib, tuman ichki ishlar bo‘limiga olib ketilgan.

Farg‘ona viloyati Ekologiya boshqarmasi holat yuzasidan rasmiy munosabat bildirgan.

“Ijtimoiy tarmoqlarda Buvayda tumani Nayman qishlog‘ida zovur atrofidagi daraxtlar noqonuniy ravishda kesilayotgani haqidagi xabarlar yuzasidan Farg‘ona viloyati prokuraturasi, viloyat Ekologiya, atrof-muhitni muhofaza qilish va iqlim o‘zgarishi boshqarmasi Buvayda tuman bo‘limi davlat inspektorlari hamda IIB 2-mintaqaviy hudud patrul-post xizmati xodimlari tomonidan shu kunning o‘zida nazorat reyd tadbirlari o‘tkazildi”, – deyiladi munosabatda.

Reyd davomida tumanning Nayman MFY hududidagi zovur atrofida noqonuniy daraxt kesish holati tasdiqlangan. 26 to‘p kam qimmatli daraxtning qonunga xilof ravishda kesilgani aniqlangan. Unga Ma’muriy javobgarlik to‘g‘risidagi kodeksning 79-moddasi 1-qismi bo‘yicha bayonnoma tuzilib, 10,3 million so‘m jarima hamda 45,8 million so‘mlik atrof-muhitga yetkazilgan zarar hisoblab chiqilgan.

Boshqarma mazkur harakatni qattiq qoralab, mansabdor shaxslar qonuniy javobgarlikka tortilishi uchun choralar ko‘rilishini ma’lum qilgan. Biroq mahalliy boshqarma hodisa vaqtida inspektorga bosim bo‘lgani haqida aniq ma’lumot bermagan.

Shuningdek, Buvayda tumani hokimligi holat yuzasidan Buvayda tumani hokimligi tomonidan xizmat tekshiruvi tayinlanib, hokim o‘rinbosari S. Xidirovning harakatlariga doir dastlabki surishtiruv ishlari olib borilayotganini ma’lum qildi.

Farg‘ona viloyati IIB rasmiy munosabatida Buvayda tumani Ekologiya qo‘mitasi inspektorini IIBga olib kelinganligi bo‘yicha axborot haqiqatga to‘g‘ri kelmasligini bildirdi. Hozirda Buvayda tumani hokimligi vakillarining xatti-harakatlariga huquqiy baho berish bo‘yicha o‘rganish ishlari olib borilmoqda.

• Bayonot
• Ekologiya
• Farg‘ona
• Hokimlik
• Qoidabuzarlik