Buxoro viloyati Peshko‘ tuman Xalq ta’limi bo‘limi bosh hisobchisi va uning o‘rinbosari jinoiy til biriktirib, yirik miqdordagi maktab byudjet mablag‘larini talon-toroj qilshgani fosh etildi.

Ta’kidlanishicha, Peshko‘ tuman Xalq ta’limi bo‘limi bosh hisobchisi U.E. va uning o‘rinbosari R.E. lavozim vakolatidan foydalangan holda 2021-yilning aprel oyidan 2022-yilning yanvar oyiga qadar jami 147 ta holatda 217 308 300 so‘mlik byudjet mablag‘larini rastrata qilish yo‘li bilan talon-toroj qilishgan. Holatga ko‘ra, Xalq ta’limiga tegishli bo‘lgan ushbu pul mablag‘lari noqonuniy tartibda sarflangan. Bu pullar Xalq ta’limi bo‘limi xodimlari, tumandagi turli maktablarda ishlovchi ishchi-xodimlar, shuningdek, har ikki mansabdorning qarindosh-urug‘larining kredit hamda kontrakt to‘lovlarini so‘ndirish uchun ko‘chirib berilgan.

Jinoyat ishlari bo‘yicha Peshko‘ tumani sudi raisi Farrux Ikromovning so‘zlariga ko‘ra, har ikki holatda ham to‘lovlarni so‘ndirish uchun yo‘naltirilgan bu mablag‘lar keyinchalik xodimlarning ish haqlaridan ushlanmay qolgan. Mablag‘lar R.E. hamda E.R.ning ta’lim tizimida mutlaqo tegishli bo‘lmagan o‘z yaqin qarindoshlarining kredit qarzdorliklarini so‘ndirish uchun noqonuniy ravishda o‘tkazib yuborilgan.

Mansab mavqeyini suiiste’mol qilib, o‘zgalarning ko‘p miqdordagi mulkini takroran o‘zlashtirish va rastrata qilish yo‘li bilan talon-toroj qilganlikda ifodalangan jinoiy harakatlarni sodir etgan har ikki lavozim egasi o‘z aybiga to‘la iqror bo‘lgan. Qilmishidan pushaymondaligini bildirgan aybdorlar tomonidan davlad byudjetiga yetkazilgan zarar to‘liq qoplab berilgan.

“Birining 6 nafar, ikkinchisining 4 nafar farzandi bo‘la turib, o‘zgalarning haqini talon-taroj qilishdan ikkilanmagan shaxslarga nisbatan sud hukmiga ko‘ra, Jinoyat kodeksining O‘zlashtirish yoki rastrata yo‘li bilan talon-taroj qilishga qaratilgan 167-moddasi, 2-qismi qo‘llanildi. Ushbu modda bilan ularga uch yil axloq tuzatish ishlari jazosi tayinlandi”, – degan sud raisi.

• Buxoro
• Firibgarlik
• Xalq ta'limi vazirligi
• pul