Buyuk Britaniya Intellektual mulk idorasi va O‘zbekiston Adliya vazirligi o‘rtasida intellektual mulk obyektlarini himoya qilish sohasida hamkorlik o‘rnatish to‘g‘risida anglashuv memorandumi imzolandi. Bu haqda “Dunyo” AA muxbiri ma’lum qildi.

Hujjat O‘zbekiston adliya vazirining o‘rinbosari Muzraf Ikramov va Buyuk Britaniya Intellektual mulk idorasi bosh direktori Adam Uilyams tomonidan imzolangan.

Ikki tomonlama uchrashuv joriy yilning 9–17-iyul kunlari bo‘lib o‘tayotgan Butunjahon intellektual mulk tashkilotiga a’zo davlatlar Bosh assambleyasi yig‘ilishining 65-sessiyasi doirasida bo‘lib o‘tgan.

Muzokaralar davomida Britaniya tomoniga O‘zbekistonda intellektual mulk sohasidagi xalqaro standartlarni joriy etishda olib borilayotgan keng ko‘lamli ishlar to‘g‘risida batafsil ma’lumot berilgan.

Tomonlar intellektual mulkning korxonalar va mamlakatlarning raqobatbardoshligini oshirish, shuningdek, iqtisodiy va ijtimoiy rivojlanishga ko‘maklashishdagi muhim rolini e’tirof etishgan.

Mazkur memorandum bir qator yo‘nalishlarni, jumladan, ekspertiza jarayonlarini to‘liq raqamlashtirish bo‘yicha tajriba almashish, intellektual mulk sohasida kadrlarni tayyorlash, intellektual mulk obyektlarini tijoratlashtirish bo‘yicha hamkorlik qilish kabi sohalarni qamrab oladi.

Eslatib o‘tamiz, mazkur hujjat imzolangan kundan boshlab kuchga kiradi va uch yil davomida amal qiladi.

• Buyuk Britaniya