Dunyoning 30 foiz aholisi hali ham koronavirusga qarshi vaksinaning birinchi dozasi bilan emlanmagan. Bu haqda Sog‘liqni saqlash vazirligi matbuot xizmati xabar berdi.

JSST ma’lumotlariga ko‘ra, sayyoramizda epidemiologik vaziyat barqarorlashgani yo‘q. Koronavirus hanuz og‘ir asoratlarga sabab bo‘lmoqda. Jahon sog‘liqni saqlash tashkiloti eksperti Mariya van Kerxovening ta’kidlashicha, haftasiga 8-10 ming kishi COVID-19 qurboniga aylanyapti.

Mutaxassis xulosasiga ko‘ra, bu holat odamlarning emlanishga yetarlicha e’tibor qaratmayotgani bilan bog‘liq. Masalan, Yer yuzi aholisining 30 foizi hali ham vaksinaning birinchi dozasini olmagan.

Vaholanki, jahonda yashovchilarning kamida 70 foizi to‘liq bosqichda emlanmagunicha global maqsadlarga erishish imkonsiz.

“Hozir dunyoda “omikron” shtammining 500 dan ortiq subvariantlari mavjud va koronavirus mutasiyasi yana davom etmoqda. Demak, xotirjamlikka berilishga hali erta va emlanish uchun kech emas”, – deyiladi xabarda.

• COVID-19
• Emlash
• JSST
• Vaksina
• koronavirus