Farg‘ona viloyatida qiymati 3,2 milliard so‘mlik kuchli ta’sir qiluvchi dori vositalarini noqonuniy olib o‘tish holati aniqlandi.

Bosh prokuratura huzuridagi Departamentning Quvasoy shahar bo‘limi, DXX, IIB hamda DXX chegara qo‘shinlarining 9229-sonli harbiy qismi xodimlari hamkorligida o‘tkazilgan tezkor tadbirda bir guruh shaxslar 30 660 dona “Regopen” va 925 dona “Tropikamid” dori vositalarini kontrabanda yo‘li bilan O‘zbekistonga olib kirgani aniqlangan.

Ma’lum qilinishicha, ular Farg‘ona tumani “Vaziyo” MFY hududida O‘zbekiston va Qirg‘iziston davlat chegarasidagi sim to‘siqlarni buzib o‘tgan.

Mazkur dori vositalari ashyoviy dalil sifatida olingan.

Holat yuzasidan Jinoyat kodeksining kontrabanda hamda kuchli ta’sir qiluvchi moddalarni noqonuniy muomalaga kiritish bilan bog‘liq moddalari asosida jinoyat ishi qo‘zg‘atilib, tergov harakatlari olib borilmoqda.