Rossiya Mudofaa vazirligi bayonotiga ko‘ra, Rossiya Qurolli kuchlari Oliy bosh qo‘mondoni qarori bilan 8-may soat 00:00 dan boshlab G‘alabaning 81 yilligi munosabati bilan maxsus harbiy operatsiya hududida barcha jangovar harakatlar to‘xtatilgan.

Biroq vazirlik ma’lumotiga ko‘ra, Ukraina Qurolli kuchlari sulh e’lon qilinganiga qaramay, Rossiya pozitsiyalari hamda Belgorod va Kursk viloyatlaridagi fuqarolik obyektlariga dron va artilleriya hujumlarini davom ettirgan.

Qayd etilishicha, Ukraina tomoni Rossiya pozitsiyalariga artilleriya, minomyot, tank va reaktiv tizimlar orqali 153 marta zarba bergan.

Shuningdek, 887 ta dron hujumi amalga oshirilgani ma’lum qilingan. Jumladan:
394 ta FPV-dron;
107 ta oktokopter turidagi dron;
171 ta samolyot turidagi dron;
215 ta dron orqali o‘q-dori tashlash holati qayd etilgan.

Rossiya Mudofaa vazirligi ma’lumotiga ko‘ra, maxsus harbiy operatsiya hududida jami 1365 ta sulh buzilishi holati aniqlangan.

Bundan tashqari, 8-maydan boshlab Rossiya havo hujumidan mudofaa tizimlari maxsus operatsiya hududidan tashqarida 396 ta havo hujumi vositasini, jumladan 390 ta samolyot turidagi dron va 6 ta “Neptun” uzoq masofali boshqariladigan raketasini urib tushirgani bildirilgan.

Rossiya tomoni Ukraina harakatlarini “terroristik xarakterdagi harakatlar” deb baholab, sulh buzilishlariga “oyna aks” tarzida javob qaytarilganini ma’lum qilgan.