Ba’zan sayohatlarni yoki yangi xonadonning ichki ta’mirini qanchalar ehtiyotkorlik bilan rejalashtiramiz. Bundan muhimroq narsa – bola tarbiyasini-chi?! Bu borada puxta o‘ylangan rejamiz bormi? Agar bunday bo‘lmasa, yozuvchi va ikki farzandning onasi Lindsi Midning misolidan ilhom olishingiz mumkin. U farzandlari 10 yoshga to‘lguniga qadar quyidagilarni aytishni rejalashtirgan.

Boshqalarni hurmat qil. Erkaklarni ham, ayollarni ham.
Maktab direktori va metrodagi uysiz odam bir xil hurmatga loyiq. Sen buni avvaldan instinktiv ravishda qilasan. Iltimos, ushbu prinsipni hech qachon o‘zgartirma.

Jismoniy faollik – ajoyib va quvonchli jarayon.
Ba’zida jim bo‘lishga undashim rost, chunki tinchlikni ma’qul ko‘raman, ammo buning ustida ishlayapman. Jismoniy faollik – butunlay normal holat. Ammo chegaralar ham bor: jismoniy zo‘rlik – normal emas. Chegara qayerdan o‘tishini bilish juda muhim.

Yo‘q – demak yo‘q. Nuqta.
Kim nima uchun “yo‘q” deyotgani muhim emas. 

Ta’sirchan ekaningni yashirma.
Hissiyotlaringni bostirma. Bir vaqtning o‘zida ham kuchli, ham ta’sirchan bo‘lishing mumkin. Aslida hissiyotga boy bo‘lish seni kuchliroq qiladi. Bu o‘g‘il bolalarga ham, qiz bolalarga ham tegishli.  

Boshqa bir odamni baxtli qilolmaysan – na meni, na dadangni, na singlingni. Hech kimni.
Bu seni majburiyating emas. Hammamiz buni bilamiz, sen ham buni yodingda tutasan, deb umid qilamiz.
Kimdir o‘z baxti uchun javobgarlikni seni zimmangga yuklashiga yo‘l qo‘yma.

O‘z hayotingga e’tiborli bo‘l.
Kunning har lahzasida qanchadan-qancha detallar bor. Atrofga e’tibor bilan nazar solar ekanmiz, mukofot sifatida hayotga to‘la kunlarni va boy xotiralarni olamiz. 

Seni o‘ziga jalb qiladigan narsani top. 
Bu nima bo‘lishi muhim emas. Atrofingda qanchadan-qancha o‘rganish, bilish va sinash uchun qiziqarli narsalar bor. Har qanday mashg‘ulotingni qo‘llab-quvvatlayman, xokkeymi u, dasturlashmi, skripka chalishmi, farqi yo‘q. Biroq chin dildan qiziqadigan narsangni topishingni istayman. 

Noshukrlikdan-da yomon narsa yo‘q.
Men qattiqqo‘l onaman, garchi jazo berish yoki urishim qiyin bo‘lsa-da. Ammo noshukrlikning mayda bir ko‘rinishini sezsam, darhol javob beraman (afsuslanmasdan). Senda kamdan-kam bunday holat bo‘ladi va tabiatan bunday emasligingga ishonaman.
Iltimos, har doim omadimiz borligi esingda bo‘lsin. Har kuni yashayotganimiz katta sharafdir. Kichik yakshanba sovg‘alari, volontyorlik, uysizlarga yordam berish, minnatdorlik qog‘ozchalari – bizning oilamiz kabi yashash naqadar katta baxt ekanligini ko‘rsatishga harakat qildim. Bu noshukrlikka qarshi eng yaxshi emlash.

Hatto biror narsa qilishni boshlamasang ham, xato qilishing mumkin.
Martin Lyuter Kingning bir gapini har doim eslayman: “Do‘stlarimizning sukut saqlashi dushmanlarimizning so‘zlaridan ko‘proq zarar yetkazadi”. Buzg‘unchi guruh rahbarini ayblash kerak, lekin unga ergashganlar ham aybdor. Ko‘zga ko‘ringan bolalar yomon ish qilishganda ularga qarshilik ko‘rsatishdan qo‘rqma.

Seni nima bo‘lishidan qat’i nazar yaxshi ko‘raman.
Xatolar – hayotning bir qismidir. Agar xato qilsang ham seni yaxshi ko‘raman. Biror narsani o‘rganish uchun o‘tmishni qo‘yib yuborib, qaytadan boshlash kerak. Men buni o‘zimning misolim bilan ko‘rsatdim, ehtimol juda aniq ko‘rsatdim: sizlarni o‘zining zaif tomonlarini ko‘rsatishdan qo‘rqmaydigan, xato qilishdan, kechirim so‘rashdan va yana qayta boshlashdan qo‘rqmaydigan ona tarbiyalamoqda

• Foydali
• Tavsiya