FIFAda 14-fevral, seshanba kuni onlayn-yigʻilish boʻlib oʻtdi. Unda qator masalalar muhokama qilindi.

Yigʻilishda keltirilishicha, FIFA moliyaviy hisobotlarni eʼlon qildi. Unga koʻra, tashkilot 2019—2022-yillar oraligʻida rekord darajada, 7,6 milliard dollar daromad qilgan.

Shuningdek, FIFA 2023—2026-yillar oraligʻida daromadni 11 milliard dollarga yetkazishni maqsad qilgani aytildi.

Maʼlum qilinishicha, Saudiya Arabistoni klublar oʻrtasidagi 2023-yilgi Jahon chempionatiga mezbonlik qiladi.

Musobaqa joriy yilning 12—22-dekabr kunlari oʻtkaziladi. Unda amaldagi formatda boʻlgani kabi 7 ta jamoa ishtirok etadi.

Shuningdek, onlayn-yigʻilishda futbol boʻyicha klublar oʻrtasidagi Jahon chempionatining yangilangan formatiga oid ayrim tafsilotlar maʼlum qilindi.

Unga koʻra, musobaqada 32 ta klub ishtirok etadi. Kvotalar esa quyidagicha taqsimlanadi:

Yevropa — 12 ta klub

Janubiy Amerika — 6

Osiyo — 4

Afrika — 4

Shimoliy Amerika — 4

Okeaniya — 1

Mezbon jamoa — 1

Yangi formatdagi musobaqaning dastlabkisi 2025-yilning iyun-iyul oylarida oʻtkaziladi.

Shu bilan birga, JCh—2026 mezbonlari Kanada, Meksika va AQShga mundial yoʻllanmasi toʻgʻridan-toʻgʻri berilgani bois Shimoliy Amerika mintaqasiga ajratilgan kvotalar soni 6 tadan uchtaga qisqaradi.

JCh—2030 mezboni nomi 2024-yilning uchinchi kvartalida eʼlon qilinadi. Mezbonlikka ariza topshirish esa 2023-yilning iyuniga qadar davom etadi.

• FIFA
• Futbol
• Klublar o‘rtasida Jahon chempionati