Kattami, kichikmi – fotoapparatning har qanday turi kam pul turmaydi. Undagi eng muhim qism bu uning obyektivi hisoblanadi. Xira tortgan, qirilgan obyektiv bilan suratlaringiz tiniq chiqmaydi, sifati pasayadi. Bunday boʻlishini istamasangiz, ularni toʻgʻri parvarishlang. Obyektivning uch asosiy dushmani – chang, namlik va mogʻor hisoblanadi.

Ultrabinafsha filtrlardan foydalaning

Sifatli ultrabinafsha filtr kamera linzasini chang, namlik va hatto urilishlardan saqlaydi. Agar qimmat obyektiv olgan boʻlsangiz ultrabinafsha filtrli shishalar ayni muddao.

Obyektivni almashtirishda ehtiyotkor boʻling

Fotoapparatga obyektivni ulash yoki ajratish vaqtida mahkamlanuvchi kamera mexanizmiga chang-gʻubor, namlik tushib qolishi mumkin. Shuning uchun obyektivni ajratayotganda qurilma teshigini doim pastga qaratgan holda ajrating. Yurganda obyektivni almashtirib yurmaslik uchun qanday masofada suratga olishingizni avvaldan oʻylab oling.

Qurilma uchun maxsus sumka, mikrofibra va silikagel sotib olishni unutmang

Har bir buyumning oʻz idishi boʻlgani yaxshi. Fotoapparat sumkasida obyektiv uchun alohida joylar boʻlishi va ular yerga tushishdan himoyalovchi xomashyodan tayyorlangan boʻlishi zarur. Mikrofibra esa qurilmalarni tozalash uchun kerak boʻladi. Fotoapparatda kir yigʻilib qolsa, u linzalarga ham tusha boshlaydi. Qurilmalarni namlik va mogʻordan saqlash uchun sumkaga silikagel qopchalarini solib qoʻying. Ularni vaqti-vaqti bilan almashtirib turishni unutmang.

Linzani ehtiyotlik bilan tozalang

Linzalarni tozalash uchun suyuqlik ishlatish mumkin emas. Yigʻilgan changni maxsus choʻtka yoki huqna noki bilan amalga oshiring. Tozalash vositalarini doim yoningizda olib yuring. Fotoapparatni doim boʻyinga osib yuring. Bu uni yerga tushib yoki urilib ketishdan saqlaydi.

Linzaga puflamang, barmoq bilan teginmang

Ayrimlar obyektiv linzasini ogʻiz bilan puflab, kiyimining cheti bilan artib tozalashga harakat qiladi. Bu obyektivning qirilishiga yoki yanada koʻproq dogʻ paydo boʻlishiga sababchi boʻladi. Bu borada sizga mikrofibra yordam beradi. Agar linzaga suv tekkan boʻlsa, yana mikrofibra matosi bilan tezgina artib tashlang.

• Foydali
• Tavsiya
• qiziqarli