Bugun, 5-oktyabr kuni futbol bo‘yicha O‘zbekiston Kubogi finalida “Navbahor” va “Andijon” jamoalari o‘zaro bahs olib bordi.

Mazkur uchrashuvning birinchi bo‘limida bir qancha xavfli vaziyatlar bo‘lishiga qaramasdan hisob ochilmadi.

Ikkinchi bo‘lim boshida esa namanganliklar darvozani ishg‘ol etishga muvaffaq bo‘ldi. 53-daqiqada Farrux Sayfiyevning qanotdan jarima maydonchasi ichiga yetkazib bergan to‘pini Abrorbek Ismoilov kuchli zarb bilan darvozani aniq nishonga oldi.

Shundan so‘ng,  82-daqiqada andijonliklar hisobni tenglashtirdi. Gol muallifi esa Muhammadkarim Toirov.

Asosiy bo‘limlarda g‘olib nomi aniqlanmagach, jamoalar qo‘shimcha bo‘limlarga murojaat qildi. Ikkinchi qo‘shib berilgan taymda “Andijon” futbolchisi Mamatkazin darvozani ishg‘ol qildi va jamoasini oldinga olib chiqdi. Oradan 2 daqiqa o‘tib, “Navbahor” futbolchisi Tabatadze hisobni tenglashtirdi.

Biroq, 120+3-daqiqada andijonliklar Vladimir Bubanyaning goli evaziga g‘alabani ilib ketdi.

Shu tariqa “Andijon” O‘zbekiston Kubogi g‘olibiga aylandi. Qayd etib o‘tish kerak, Andijon klubi o‘z tarixida ilk bor kubokni qo‘lga kiritdi.

O‘zbekiston Kubogi. Final

“Navbahor” — “Andijon” 2:3

Gollar: 1:0 — 53 Ismoilov, 1:1 — 82 Toirov, 1:2 — 116 Mamatkazin, 2:2 — 118 Tabatadze, 2:3 — 120+3 Bubanya.

• Andijon
• Navbahor