O‘zbekiston futzal terma jamoasi 2026-yilgi futzal bo‘yicha Osiyo Kubogi chorak finalida Eron terma jamoasiga qarshi maydonga tushdi. “Jakarta xalqaro velodromi” majmuasida bo‘lib o‘tgan uchrashuvda Nodir Eliboyev boshqaruvidagi jamoa 4:7 hisobida mag‘lubiyatga uchradi.

Uchrashuvdagi hisobni O‘zbekiston terma jamoasi ochdi. 1-daqiqada Ixtiyor Ropiyev belgilangan penaltini aniq ijro etib, jamoani oldinga olib chiqdi. 5-daqiqada Elbek To‘lqinov Ropiyevning uzatmasidan so‘ng farqni ikkitaga oshirdi. Shundan so‘ng Eron futzalchilari ustunlikni qo‘lga oldi. 6-daqiqada Muslim Oladgobad, 9-daqiqada Said Ahmadabbosi, 12-daqiqada Muhammadhusayn Derahshoni, 18-daqiqada Husayn Sabziy gol kiritib, hisobni 4:2 ga yetkazdi.

Ikkinchi bo‘lim ham keskin kurashlarga boy bo‘ldi. 25-daqiqada Husayn Toyibi penaltidan gol kiritdi. 26-daqiqada Sunnatilla Jo‘rayev hisobni qisqartirdi. 31-daqiqada darvozabon Abbos Elmurodov uzoq masofadan berilgan zarbani qaytardi, biroq to‘pga jarima maydonchasidan tashqarida qo‘l bilan teggani uchun unga qizil kartochka ko‘rsatildi. Eronliklar belgilangan jarima zarbasidan unumli foydalanib, hisobni 6:3 ga oshirdi. 33-daqiqada Muzaffar Ahadjonov O‘zbekiston terma jamoasining 4-golini kiritdi. 39-daqiqada Sabziy dubl qayd etib, uchrashuvga mantiqiy yakun yasadi. Yakuniy hisob 7:4 Eron foydasiga.

Shu tariqa, Eron yarim finalga yo‘l olgan bo‘lsa, O‘zbekiston terma jamoasi esa musobaqa bilan xayrlashdi.

• Eron
• Futzal
• Osiyo kubogi
• O‘zbekiston