“AQSh hukumati Garvard universitetiga xorijlik talabalarni o‘qishga qabul qilishni taqiqladi”, – The New York Times.

Ichki xavfsizlik vazirligi universitetga talabalarni almashinuv asosida qabul qilish imkonini beruvchi dastur sertifikatini zudlik bilan bekor qilish to‘g‘risida xat yuborgan.

Sertifikat bekor qilingani sababli Garvard endi chet elliklarga AQShda o‘qish vizasini olish uchun zarur bo‘lgan hujjatlarni bera olmaydi. Garvardda o‘qiyotgan xorijliklar boshqa universitetga o‘tishlari kerak, aks holda, ular mamlakatda qolish huquqidan mahrum bo‘ladi.

Garvard rahbariyati hukumatning harakatlarini noqonuniy deb hisoblashini ma’lum qildi.

AQSh hukumati aprel oyi o‘rtalarida birinchi marta Garvardga xorijlik talabalarni qabul qilishni taqiqlash bilan tahdid qilib, universitet rahbariyatidan u yerda tahsil olayotgan xorijliklarning “noqonuniy va zo‘ravonlik harakatlari” haqida hisobot berishni talab qilgandi. Ichki xavfsizlik vazirligi universitetni talabalarning Falastin tarafdori bo‘lgan noroziliklari tufayli “antisemitizmga yo‘l qo‘yishda” ayblamoqda.

Bir necha kun oldin AQSh Garvard universitetiga ajratilgan 60 mln dollarlik federal grantlarni bekor qildi, bunga oliygohning antisemitik ta’qib va etnik kamsitish muammolarini hal qilmagani sabab qilib ko‘rsatildi.

Bunga parallel ravishda aprel oyida Oq uy Garvarddan keng ko‘lamli islohotlar o‘tkazishni talab qildi, aks holda, universitetni federal moliyalashtirishdan butunlay mahrum qilinishini bildirdi. Hukumat talablari orasida faol o‘qituvchilarning ta’sirini kamaytirish va “Amerika qadriyatlari va institutlariga dushman” talabalarni qabul qilishni to‘xtatish ham bor edi. Garvard buni rad etdi, shundan so‘ng rasmiylar umumiy qiymati 2,2 milliard dollarlik grantlarni muzlatib qo‘ydi.

Ma’lumotlarga ko‘ra, 2024−25-o‘quv yilida Garvardda 6800 ga yaqin xalqaro talaba tahsil olgan yoki talabalar sonining taxminan 27 foizini tashkil etgan, deya qayd etdi NYT.

• AQSh