O‘zbekistonda 1-apreldan boshlab gaz va elektr energiyasi tariflari oshiriladi. Ushbu xizmatlar uchun oldindan to‘lov amalga oshirilsa, eski tariflar aholi uchun ikki oy davomida (1-iyungacha), tadbirkorlik subyektlari uchun esa bir oy davomida amal qiladi.

Elektr energiyasi va tabiiy gazdan foydalanish qoidalariga muvofiq, tarif o‘zgargan taqdirda, yangi tariflar kuchga kirgan kundan boshlab:

- maishiy iste’molchilar avvaldan to‘langan hajm uchun ikki oydan oshmaydigan muddatga qo‘shimcha to‘lovlardan ozod qilinadi;

- boshqa iste’molchilar (jumladan, tadbirkorlar) esa bir oydan oshmaydigan muddatga qo‘shimcha to‘lovlardan ozod etiladi.

Bundan ma’lum bo‘ladiki, 1-aprelgacha oldindan to‘lovni amalga oshirganda ikki oy davomida (1-iyungacha) eski tariflar amal qiladi. Ammo bu faqat ijtimoiy me’yor doirasidagi iste’mol hajmiga — 100 kub metr gaz va 200 kVt/soat elektr energiyasiga taalluqlidir. Ushbu hajmlar oshib ketganda, ikki baravar miqdorda tarif qo‘llaniladi.

Misol uchun, agar oila oldindan to‘lovni amalga oshirib, bir oy davomida 300 kVt/soat elektr energiyasidan foydalangan bo‘lsa, 200 kVt/soat uchun to‘lov 90 ming so‘mni (eski tarif bo‘yicha 450 so‘m), keyingi 100 kVt/soat uchun ham 90 ming so‘mni (ikkilangan tarif bo‘yicha 900 so‘m, u 1000 kVt/soatgacha qo‘llaniladi, keyin oshadi) tashkil etadi.

Agar oldindan to‘lov qilinmasa, may oyi uchun 300 kVt/soat 220 ming so‘mga (120 ming + 100 ming so‘m) tushadi.

• Elektr energiyasi
• Energetika_vazirligi
• Gaz