2025-yil 15-oktyabr kuni Azon Global tahririyati media platformaning faoliyati to‘xtatilishini ma’lum qildi. Rasmiy bayonot loyiha saytida e’lon qilindi. Unda jamoa bu qarorni qonunga hurmat va jamiyat oldidagi mas’uliyatni his etib qabul qilganini ta’kidladi.

“Biz — Azon Global jamoasi, qonunga hurmat va itoat yuzasidan barcha media faoliyatimizni to‘xtatishga qaror qildik. Bu og‘ir, ammo vijdon, ustozimizga bo‘lgan hurmat va jamiyatga sadoqat asosida qabul qilingan qaror”, — deyiladi bayonotda.

Tahririyat ma’lumotga ko‘ra, loyiha faoliyati sud hukmi bilan bloklanganidan keyin qonun talablariga muvofiq ravishda to‘xtatilgan. Jamoa bu vaziyatni tinchlik va sabr bilan qabul qilganini qayd etdi.

Eslatib o‘tamiz, 8-oktyabr kuni jinoyat ishlari bo‘yicha Toshkent shahar Uchtepa tumani sudida Azon Global loyihasi asoschisi Mubashshir Ahmad (Alisher Tursunov) ishi bo‘yicha sud jarayoni yakunlangan edi. Sud hukmiga ko‘ra, u 2 yil 6 oy muddatga ozodlikdan mahrum qilingandi.

• Loyiha
• Sud
• taqiq