Tbilisida minglab odamlar xorijiy agentlar haqidagi qonunga qarshi namoyishga chiqdi. Qayd etilishicha, bu Gruziyaning Yevropa Ittifoqiga qo‘shilishiga to‘sqinlik qilishi mumkin.

Xabarlarga ko‘ra, 7-mart kuni xorijiy agentlar to‘g‘risidagi qonun loyihasini birinchi o‘qishda qabul qilgan Gruziya parlamenti oldidagi namoyishlarda bir necha ming kishi qatnashgan. Agar tashabbus qabul qilinsa, Gruziya Yevropa Ittifoqiga nomzod maqomini olish va NATOga kirish imkoniyatidan mahrum bo‘lishi mumkin.

Tbilisida parlament yaqinidagi namoyishlar politsiya bilan to‘qnashuvlarga aylanib ketdi. Namoyishchilarga qarshi maxsus kuchlar ko‘zdan yosh oqizuvchi gaz va suv purkagichlardan foydalangan, namoyishchilar politsiyaga shishalar, shamlar va “molotov kokteyl”lari uloqtirgan. Gruziya prezidenti Salome Zurabishvili esa namoyishchilarni qo‘llab-quvvatlashini bildirgan.

• Gruziya
• Namoyish
• Yevropa Ittifoqi