Turkmaniston Xalq maslahati raisi Gurbanguli Berdimuhamedov Turkiy Davlatlar Tashkilotining Anqarada bo‘lib o‘tgan navbatdan tashqari sammitida Turkiya Respublikasi Prezidenti Rajab Toyyib Erdog‘an nomzodini Tinchlik uchun Nobel mukofotiga ko‘rsatishni taklif qildi. Bu haqda u bugun, 16-mart kuni so‘z ochdi.

U Rajab Toyyib Erdog‘an bilan do‘stligi 22 yillik tarixga borib taqalishiga alohida urg‘u berdi.

“Qadrli do‘stim Rajab Toyyib Erdog‘an! Biz siz bilan 22 yildan buyon tanishmiz. Bu yillar ichida Turkmanistonga ko‘rsatgan yordamingiz uchun turkman xalqi nomidan samimiy minnatdorlik bildiraman”, deydi Berdimuhamedov.

Berdimuhamedov Erdog‘an dunyoda muhim siyosiy shaxsiyat ekanini aytib, uni Tinchlik uchun Nobel mukofotini olishga loyiq rahbar ekanini bildirdi.

“U nafaqat o‘z xalqi, balki butun musulmon xalqlarining tinch-totuv yashashi uchun katta sa’y-harakatlarni amalga oshirmoqda. Erdog‘an mintaqada va dunyoda tinchlik va xavfsizlik, barqaror rivojlanish va xalqaro munosabatlarda o‘zaro tushunishni ta’minlash borasida ulkan ishlarni amalga oshirmoqda. Bularni inobatga olgan holda Turkiya Prezidenti Rajab Toyyib Erdog‘anni Tinchlik uchun Nobel mukofotiga nomzod qilib ko‘rsatamiz va bu yo‘nalishdagi barcha takliflarni qo‘llab-quvvatlaymiz. Erdog‘an haqiqatan ham ushbu xalqaro mukofotga loyiq boshqaruvchi”, deydi Turkmanistonning sobiq Prezidenti.

Shuningdek, Gurbanguli Berdimuhamedov Turkmaniston tez orada Turkiy Davlatlar Tashkilotiga to‘laqonli a’zo bo‘lishini aytib, tashkilotga a’zo va kuzatuvchi davlatlar rahbarlarini Ashxobodga taklif qilgan.

“Agar qonunchiligimiz takomillashtirilsa, Turkmaniston turkiy oila qatoriga qo‘shilishi mumkinligiga ishonaman”, – deydi sobiq prezident.

Berdimuhamedov, shuningdek, Marv shahrini 2024-yilda turkiy dunyoning madaniy poytaxti deb e’lon qilishni ham taklif etgan. U fevral oyidagi zilzilalar haqida gapirar ekan, turk dunyosi birligi muhimligini qayd etgan.

• Erdogʻan
• Gurbanguli Berdimuhamedov
• Turkiya
• Turkmaniston