Joriy yilning 5-fevral kuni Ichki ishlar vazirligida “Yangi O‘zbekistonni korrupsiyadan holi mamlakatga aylantirishda birlashaylik!” mavzusida anjuman bo‘lib o‘tdi. Bu haqda Korrupsiyaga qarshi kurashish agentligi Axborot xizmati  maʼlum qildi.

Tadbirda mamlakatimizda korrupsiyaga qarshi kurashish borasida amalga oshirilayotgan islohotlar, shuningdek, IIV tizimida sodir etilgan korrupsion holatlar tahlil qilinib, ushbu illatga qarshi kurashish bo‘yicha ko‘rilishi lozim bo‘lgan taʼsirchan choralar muhokama qilindi. 

Xususan, korrupsiyaga qarshi kurashish agentligiga 2021-yilda kelib tushgan jami 4 901 ta murojaatning  343 tasi yoki 7 foizi ichki ishlar organlari xodimlarining xatti-harakatlari va qarorlaridan norozi bo‘lgan holda yuborilgan murojaatlarni tashkil qilgan.

Maʼlumotlarga ko‘ra, 2020-yilda IIOlarining 46 nafar xodimi korrupsion jinoyatlar sodir etganligi uchun jinoiy javobgarlikka tortilgan. 2021-yilda esa bu ko‘rsatkich deyarli 2 baravarga ortib, 89 nafar xodim tomonidan 119 ta korrupsion jinoyatlar sodir etilgan.   

Xabarga ko‘ra, korrupsiyaga qarshi kurashish ishlarining samaradorligini reyting baholash yo‘nalishlari bo‘yicha belgilangan indikatorlar va korrupsiyaga qarshi kurashish samaradorligi “qoniqarsiz” deb topilgan davlat tashkilotlari rahbarlariga belgilangan tartibda intizomiy javobgarlik choralarini qo‘llash masalasi ko‘rib chiqilgan.

• Aksilkorrupsiya
• IIV
• Jinoyat
• Korrupsiya