Oʻz-oʻzi bilan boʻlishni istaydigan insonlar fan tilida introvertlar deb atalib, ular notanish insonlar bilan muloqotga kirishishda muammolarga duch kelishadi. Baʼzida biz ham aynan shu kabi muammoni boshdan kechiramiz. Quyida buni yengish uchun foydali tavsiyalarni siz bilan boʻlishamiz.

Birinchi boʻlib siz salom bering. Tavsiya biroz ajoyib tuyulishi mumkin, lekin asosan introvertlar suhbatni birinchi boshlashdan va salom berishdan hayiqishadi. Ammo, aynan mana shu oddiy harakatlar odamlarga doʻstona munosabatda ekanligingizni koʻrsatadi.

Xatti-harakatlaringizga eʼtibor boʻling. Oʻzingizga boʻlgan ishonchni qozonish va odamlar bilan muloqotni yaxshilash uchun xatti-harakatlaringiz bilan muloqotga ochiq ekanligingizni koʻrsating, aytayotgan soʻzingizga nisbatan yuz mimikangiz, qoʻl-oyoq harakatingizga ahamiyatli boʻling. Psixologiyada tana tili alohida yoʻnalish sifatida oʻrganiladi.

Qoʻllaringiz bilan keskin harakatlar qilmang va koʻz qorachigʻingizni olib qochmaslikka harakat qiling.

Oyna bilan mashq qiling. Oyna oldida matn oʻqish yoki shunchaki oʻzingiz bilan biror bir mavzuda suhbatlashishga harakat qiling. Bu tana tilini nazorat qilish va oʻrganish imkoniyatini ham beradi. Oʻzingizni goʻyoki intervyu berayotgan inson kabi tuting.

Savol bering. Qaysi davrada boʻlishingizdan qatʼiy nazar imkon boʻlsa oʻzingizni qiziqtirgan savolni berishga oʻrganing. Toʻgʻri, boshida qiyinchilikka duch kelasiz. Yuragingiz tez urishni, boshingizda ogʻriq paydo boʻlishni boshlaydi. Lekin siz buni yenga olasiz.

Gapirayotganingizda ovozingizda ishonch boʻlishini nazorat qiling. Ovoz balandligiga, tovushlar aniq talaffuz qilinishiga ahamiyatli boʻling.

Natija boʻlmasa xafa boʻlmang. Ilk urinishlar yoki baʼzi tanishuvlar siz kutgan darajada yakunlanmasligi mumkin. Bu tabiiy va xafa boʻlish uchun asos emas. Har qanday holatda ham maqsadingiz sari harakatni davom ettiring.

• Foydali
• qiziqarli