Mobil qurilmadan uzoq vaqt foydalanish natijasida aloqaning yomonlashishi, suhbatdoshingizning ovozi yaxshi eshitilmasligi kabi muammolar paydo boʻlishi mumkin. Buning ikkita sababi bor: birinchisi dinamikning ishdan chiqqani boʻlsa, ikkinchisi dinamikning chang va kirga toʻlib qolganidir. Telefon dinamigini qanday qilib tozalash kerakligini bilasizmi?

Agar telefon dinamigi chang va kir bilan toʻlib qolgan boʻlsa, ushbu muammoni mutaxassis yordamida osonlikcha hal qilishingiz mumkin. Ammo, dinamikni oʻzingiz ham tozalasangiz boʻladi, buning hech qanday qiyin joyi yoʻq. Shunchaki, oʻziga xos jihatlarni bilib olsangiz bas.

Tish choʻtkasi yordamida dinamikning ustki qismini aylana harakatlar bilan ishqalaysiz. Bunda choʻtka teshikchalar orasiga kirishi va u yerdagi changni tashqariga olib chiqishi kerak. Dinamikka ziyon yetkazib qoʻymaslik uchun harakatlaringizning imkon qadar yengil boʻlishiga eʼtibor bering.

Dinamikni choʻtka yordamida tozalash bir necha daqiqa vaqtingizni oladi. Shundan keyin dinamikning ustidan yumshoq saqichni yurgizib olishingiz ham mumkin. U teshikchalar orasida qolib ketgan chang zarralarini tashqariga olib chiqadi.

Telefonni tozalab boʻlgach, dinamikni toza mato bilan artib olasiz. Shundan keyin, ovoz sifatini tekshirib koʻrasiz. Aksariyat hollarda tozalash jarayonidan keyin suhbatdoshingizning ovozi nisbatan yaxshiroq eshitila boshlaydi.

Agar tish choʻtkasining oʻzi natija bermagan boʻlsa, ignadan ham foydalansa boʻladi. Ammo, uni tirqishlar ichiga yarim millimetrdan koʻp kiritish mumkin emas.

Ushbu usullar ham sizga yordam bermagan holatda telefonni ustaga koʻrsatish kerak. U dinamikni kerakli yoʻsinda tozalab beradi, zarurat boʻlgan holatda almashtiradi.

• Foydali
• qiziqarli