Bugun ushbu mavsum startidan yangi formatda bo‘lib o‘tayotgan Yevropa Chempionlar Ligasi doirasida 5-turning qolgan uchrashuvlari davom ettiriladi. Ahamiyatlisi, turning markaziy bahsi deya e’tirof etilayotgan uchrashuvda turnirning amaldagi chempioni “Real Madrid” va bu mavsum musobaqada hozircha ochko yo‘qotmagan yagona jamoa – “Liverpul” o‘zaro to‘qnash keladi.

Turnir jadvaliga nazar soladigan bo‘lsak, mavsumni birmuncha muammolar bilan boshlagan va jarohatlar girdobida qolib ketayotgan “qaymoqranglilar” ikkita g‘alaba va shuncha mag‘lubiyat bilan 6 ochko jamg‘argan holda 21-o‘rinda bormoqda. Angliya jamoasi APLdagi singari ChLda ham barqaror o‘yinlar o‘tkazyapti va 4 ta turdan so‘ng maksimal 12 ochko to‘plab 3-o‘rinda (bugungi bahsdan so‘ng peshqadamlikka qaytishi mumkin) .

Jamoalar ChL doirasida jami 11 bora to‘qnash kelishgan. 7 ta bahsda Madrid klubi ustun kelgan bo‘lsa, mersisaydliklar hisobida 3 ta g‘alaba bor va bir o‘yin durrang bilan yakunlangan.

Ushbu klublarning oxirgi 3 ta qarama-qarshiligida quyidagi hisoblar qayd etilgan:

“Real Madrid” 1-0 “Liverpul”;

“Liverpul” 2-5 “Real Madrid”;

“Liverpul” 0-1 “Real Madrid”.

Ko‘rib turganingizdek “Liverpul” anchadan buyon “Real”ni yuta olmayapti, bugun ular revansh olishga urinib ko‘rishadi.

Eslatib o‘tamiz, jamoalarning navbatdagi uchrashuvi “Enfild” arenasida 28-noyabrga o‘tar kechasi Toshkent vaqti bilan soat 01:00 da start oladi.

• Chempionlar Ligasi
• Liverpul
• Real