O‘zbekiston Respublikasi Prezidenti topshirig‘iga muvofiq, madaniyat va san’at sohasini rivojlantirish hamda mavjud muammolarni hal etish maqsadida ochiq muloqotlar tashkil etilmoqda.

Mazkur uchrashuvlarda soha vakillari, ijodkorlar, tadbirkorlar hamda yoshlar ishtirok etishi mumkin. Muloqotlar Prezident Administratsiyasi vakillari, Madaniyat vaziri Ozodbek Nazarbekov hamda tegishli vazirlik va idoralar rahbarlari ishtirokida o‘tkaziladi.

Ochiq muloqotlar 2026-yil 20–25-aprel kunlari tasdiqlangan jadval asosida bo‘lib o‘tadi.

Uchrashuvlar kino va animatsiya, ijrochilik san’ati, adabiyot, teatr va sirk, xalq ijodiyoti, blogerlik faoliyati, madaniy meros, tasviriy va amaliy san’at, madaniyat ta’limi hamda bolalar kontenti kabi yo‘nalishlarni qamrab oladi.

Muloqotlar davomida sohadagi dolzarb muammolar muhokama qilinadi, amaliy takliflar qabul qilinadi va yangi tashabbuslar ko‘rib chiqiladi. Eng muhim takliflar mualliflari Davlat rahbari ishtirokidagi yig‘ilishga taklif etilishi mumkin.

Ochiq muloqotlarda ishtirok etish uchun oldindan ro‘yxatdan o‘tish talab etiladi. Ro‘yxatdan o‘tish Telegram’dagi maxsus bot orqali amalga oshiriladi: @mv_ochiqmuloqot_bot.

Shuningdek, uchrashuvlar jadvali bilan quyidagi havola orqali tanishish mumkin:
https://gov.uz/oz/madaniyat/news/view/155255

Eslatib o‘tamiz, bot orqali ro‘yxatdan o‘tmagan fuqarolar uchrashuvlarga kiritilmaydi.

• Madaniyat
• San’at
• muloqot