Namangan davlat universitetida pichoqlangan ayol voqeasi bo‘yicha yangi tafsilotlar ma'lum qilindi.

6-may kuni soat 12:00 da To‘raqo‘rg‘on tumanida yashovchi fuqaro Namangan davlat universiteti binosi oldida oilaviy kelishmovchilik sababli turmush o‘rtog‘i bilan janjallashib, uni pichoqlab, o‘limiga sababchi bo‘lgani haqida xabar berilgan edi.

Bosh prokuratura matbuot xizmati rahbari Hayot Shamsutdinov erkak 26 yoshda, ayol esa 23 da bo‘lganini qayd etgan. Xotinini pichoqlaganidan so‘ng u o‘ziga ham pichoq urib, o‘z joniga suiqasd qilgan. Voqea joyida bo‘lgan fuqarolar erkakni shifoxonaga hushsiz holatda olib borishgan.

Aniqlanishicha, ushbu jinoyatni sodir qilgan shaxs turmush o‘rtog‘i bilan 2022-yilning yanvar oyidan buyon o‘zaro oilaviy janjal sababli ajrashib, birga yashamasdan kelgan. Shundan so‘ng u turmush o‘rtog‘ini o‘zi bilan birga yashashga majbur qilib, asossiz rashk qilib kelgan holda bir necha marotaba janjallashib yurgan.

Viloyat oila va xotin-qizlar boshqarmasi matbuot xizmati ularning bir nafar farzandi borligini maʼlum qildi. Oilada kelishmovchiliklar bo‘lgani sababli ayol ota uyiga ketgan. 2022-yil aprel oyida ushbu oila oilaviy qadriyatlarni mustahkamlash komissiyasi tomonidan yarashtiriladi.

Maʼlum muddatdan so‘ng yana oiladagi nizolar ortib boradi. Juda ko‘p murojaatlaridan so‘ng, ikkala mahalla MFY faollari ajrimga xulosa berishga majbur bo‘ladi. Oilani tiklash imkoni bo‘lmagani uchun sudga qilingan murojaatlaridan so‘ng sud ajrim uchun 6 oy muhlat bergan va hozirgacha 5 oy o‘tgan.

Mazkur holat yuzasidan Namangan shahar prokuraturasi tomonidan Jinoyat kodeksining 97-moddasi bilan jinoyat ishi qo‘zg‘atilib, gumon qilinuvchi protsessual tartibda ushlangan va hozirda tergov harakatlari olib borilmoqda.

• IIB
• Jinoyat
• Namangan
• Qotillik
• suiqasd