Germaniyaning Berlin shahrida istiqomat qiluvchi suratkash Boris Eldagsen nufuzli xalqaro tanlov – “Sony World Photography Award” g‘olibi deb topilgan bo‘lsa-da mukofotdan voz kechishga qaror qildi va u tomonidan tanlovga taqdim etilgan “surat” aslida neyrotarmoq tomonidan yaratilganini tan oldi.

Ma’lum bo‘lishicha, Eldagsen suratni tanlovda ishtirok etish uchun 2022-yilning dekabr oyida taqdim etgan. Oq-qora rangda ishlangan suratda ikki avlod vakili bo‘lmish ayollarni ko‘rish mumkin. Suratkash joriy yilning 2-mart kuni o‘zining shaxsiy saytida tanlovda g‘olib bo‘lganini ma’lum qilgan va mukofotni olishdan bosh tortgan. Suratkash uning mazkur tajribasi jamoatchilik e’tiborini ushbu masalaga qaratish uchun amalga oshirilganini aytib o‘tgan.

“Sun’iy intellekt tomonidan yaratilgan suratlar haqiqiy asarlar bilan raqobatlasha olmasligi kerak, bular butunlay boshqa-boshqa narsalar. Biz aynan nimalarni haqiqiy surat deb hisoblash va hisoblamaslik masalasida jiddiy bahsga muhtojmiz”, – deb yozgan Eldagsen.

Tanlov tashkilotchilari esa suratning sun’iy intellekt tomonidan yaratilganini bilishmagan. Eldagsen tashkilotchilarga suratga aloqador ma’lumotlarning hammasini ham taqdim etmagan. 

• Fotografiya
• Madaniyat
• qiziqarli
• tanlov