New Atlas nashrining xabariga ko‘ra, Avstraliyaning Flinders universiteti olimlari tunda og‘ir ko‘rpa yopinib yotganda, u organizmga qanday foyda berishi aniqlangan. Og‘ir ko‘rpa uyqu sifatini yaxshilaydi, kayfiyatni ko‘taradi, uyqu dorilaridan voz kechishga yordam beradi.

Olimlar tadqiqotni quyidagicha o‘tkazishgan.

Tadqiqotchilar guruhi turli kasalliklarga chalingan barcha yosh toifasidagi odamlarda uyquni davolash usuli sifatida og‘irlashtirilgan ko‘rpalardan foydalanish bo‘yicha 18 ta tadqiqotni tahlil qildi.

Ularda butun material bo‘ylab bir tekis taqsimlangan plastmassa, shisha yoki metall donachalar bilan to‘ldirilgan katta o‘lchamli yopinchiqlardan foydalanilgan. Bunday ko‘rpaning tanaga bergan bosimi quchoqlash hissini hosil qiladi, bu esa tanani bo‘shashtirish va xavotirni kamaytirishga yordam beradi.

Og‘ir ko‘rpa ostida uxlagan kattalar yaxshiroq uyquga ketishgani va o‘zlarini tetikroq his qilishganini aytdi. Ular uyqusizlikka qarshi dorilarga kamroq ehtiyoj sezgan va og‘riqlardan kamroq shikoyat qilgan. Bolalar uchun esa natijalar har xil.

Ba’zi hollarda og‘irlashtirilgan ko‘rpalar diqqat yetishmovchiligi va giperfaollik sindromi yoki autizm spektri buzilishlari bo‘lgan bolalarda uyqu sifatining ma’lum darajada yaxshilanishini ta’minlagan.

Biroq boshqa tadqiqotlar shunday ko‘rpalarning bolalar kundalik faoliyatiga ijobiy ta’sirini aniqlagan. Tadqiqot natijalari tibbiyot amaliyotida, ayniqsa ruhiy salomatlik sohasida, og‘ir ko‘rpalardan foydalanish bo‘yicha yo‘riqnomalarni ishlab chiqish uchun asos bo‘lib xizmat qilishi kutilmoqda.

• Foydali
• qiziqarli
• tadqiqot