Florida universiteti olimlari tarixda ilk marta Oy tuprogʻida oʻsimlik yetishtirishning uddasidan chiqdilar. Ular tajriba jarayonida “Appolon” missiyasi astronavtlari tomonidan keltirilgan tuproqdan foydalanishgan. Tuproq namunasiga salat bargi urugʻlari ekilgan va urugʻlar tez orada unib chiqqan. Oy tuprogʻida oʻsimliklar yetishtirish mumkin ekanligi kelgusidagi missiyalar uchun muhim ahamiyat kasb etadi.

Olimlarning aytishlaricha, Oy tuprogʻining “kamchiliklari” ham yoʻq emas. U qattiq boʻlgani tufayli oʻsimliklar unib chiqqandan keyin oradan bir hafta oʻtib, oʻsish tezligi keskin pasaygan.

Mutaxassislar bunga Oy yuzasining kuchli kosmik nurlanish taʼsiri ostida ekanligini sabab sifatida koʻrsatishgan.

Tajribalar yakunida oʻsimliklar yetishtirish uchun “Apollon-11” missiyasi tomonidan keltirilgan namunalar boshqalariga nisbatan munosibroq ekanligi taʼkidlangan. Ushbu namunalar Oydagi “Xotirjamlik” dengizining tubidan olingan. Olimlar tajriba uchun keltirilgan tuproq 2 milliard yil davomida nurlanish taʼsirida boʻlgan degan xulosaga kelganlar.

Eslatib oʻtamiz, “Apollon” missiyasi ishtirokchilari Yerga Oydan 381 kilogrammga teng tosh va tuproq namunalarini olib kelishgan. Tuproqning 12 grammi Florida universiteti olimlariga tajribalar oʻtkazish uchun ajratib berilgan.

• Koinot
• ilm-fan
• tadqiqot