Turkiya Superligasi 11-turidan o‘rin olgan “Bashakshehir” hamda “Kojaelispor” jamoalari o‘rtasidagi bahs yakuniga yetdi. Istanbuldagi “Fotih Terim” stadionida kechgan bellashuvda mezbonlar kichik 1:0 hisobida g‘alaba qo‘lga kiritishdi.

Uchrashuvdagi yagona gol 90+1-daqiqada “Bashakshehir”ning o‘zbekistonlik hujumchisi Eldor Shomurodov tomonidan kiritildi. Shomurodov hakam tomonidan belgilangan 11 metrlik jarima zarbasini aniq amalga oshirib, jamoasiga muhim 3 ochko taqdim etdi.

Mazkur natijadan so‘ng Nuri Shahin boshchiligidagi “Bashakshehir” hisobidagi ochkolar soni 13 taga yetib, jamoa Turkiya Superligasi turnir jadvalida 9-pog‘onaga ko‘tarilib oldi. Mag‘lubiyatga uchragan “Kojaelispor” klubi esa 11 ochko bilan 11-pog‘onada qoladigan bo‘ldi.

Shuningdek, Eldor Shomurodov ushbu bellashuvda amalga oshirilgan muvaffaqiyatli penalti orqali chempionatdagi gollari sonini 7 taga yetkizib oldi. Eldor hozirda Turkiya Superligasi to‘purari bo‘lib turibdi.

• Eldor Shomurodov
• Futbol
• Turkiya