Oʻqituvchilar zimmasiga yuklatilgan qoʻshimcha vazifalarni taqiqlash boʻyicha koʻrsatma berildi.

Xalq taʼlimi vazirligi tomonidan hududiy boʻlinmalarga ogohlantirish berilgani maʼlum qilindi.

“Hurmatli keng jamoatchilik vakillari!

Xabaringiz bor, so‘nggi yillarda Davlatimiz rahbarining ta’lim sohasiga doir qator tashabbuslari natijasida o‘qituvchilarning faqat o‘z xizmat faoliyatiga oid ishlar bilan shug‘ullanishi qat’iy belgilab qo‘yildi.

Afsuski, belgilangan mazkur choralarga qaramay joylarda mutasaddi rahbarlar tomonidan o‘qituvchilar zimmasiga ortiqcha vazifalar yuklash va bu topshiriqlarni bevosita Xalq ta’limi vazirligi tomonidan yuborilayotganligi bilan xaspo‘shlash holatlari kuzatilmoqda.

Kuni kecha ijtimoiy tarmoqlar orqali maktab o‘qituvchilarining  navbatdagi o‘quv yilida maktabga chiqishi kutilayotgan bolalarning ro‘yxatini uyma-uy yurgan holda yig‘ib chiqayotgani bilan bog‘liq xabar tarqaldi. Faoliyat boshlaganimga qariyb 1 yil muddat bo‘layotgan bo‘lsa, vazirlik tomonidan o‘qituvchilarning xizmat majburiyatidan tashqari ish bilan shug‘ullanishi bo‘yicha hech qanday topshiriq berilmadi. Aksincha, joylarda aniqlangan bunday holatlar bilan doimiy ravishda murosasiz kurash olib borilmoqda.

O‘qituvchilarning uyma-uy yurib, bolalarni ro‘yxatga olish bilan bog‘liq holatga kelsak, kechaning o‘zida vazirlikning hududiy bo‘linmalariga maktab pedagoglariga bunday o‘zboshimcha topshiriqlar berilmasligi yuzasidan ogohlantirish berildi.

Aytish lozimki, o‘tgan bir yillik faoliyatim  davomida mamlakatimizning 200 dan ortiq tuman va shaharlaridagi 1 600 ta maktabda bo‘ldim. Mazkur hududlarda mavjud barcha maktab rahbarlari bilan uchrashuvlar tashkil qilib, o‘qituvchilarga munosabat o‘zgarishi lozimligi, ularni e’tiborini bolalarning ta’limiga qaratish, ortiqcha vazifalarga jalb etmaslik bo‘yicha doimiy ravishda ta’kidlab kelaman.

Shu o‘rinda Davlatimiz rahbarining tegishli qaroriga asosan, maktab o‘qituvchilari dars va to‘garak mashg‘ulotlarini tashkil etish hamda sinf jurnalini yuritishdan tashqari boshqa barcha ishlardan, jumladan pedagogik yuklamalar bo‘yicha hisobotlar va qo‘shimcha ma’lumotlarni talab qilish, xizmat majburiyati bilan bog‘liq bo‘lmagan ishlarga jalb etish qat’iyan taqiqlanganligini yana bir bor eslatib o‘tamiz.

Maktab yoshigacha bolalar ro‘yxatini shakllantirish hamda umumiy o‘rta ta’limga qamrab olish masalasi Xalq ta’limi vazirligi tomonidan Ichki ishlar vazirligining manzil-ro‘yxat axborot xizmati hamda Adliya vazirligining FHDYO bo‘limlari elektron tizimiga integratsiya qilingan holda bosqichma-bosqich olib borilayotganligini qayd etmoqchiman.

Hurmatli soha mutasaddilari!

O‘qituvchilarning asosiy vazifasi o‘quvchilarga bilim berish orqali mamlakatimiz taraqqiyoti va kelajagini ta’minlashdir. Zero, bizning oldimizda Vatanimizning ertangi kunini belgilab beradigan kelajak avlodni tarbiyalash kabi mas’uliyatli ish turibdi.

Davlatimiz rahbari ta’kidlaganidek, bizning asosiy maqsadimiz, barkamol avlodni voyaga yetkazish orqali yurtimizni dunyodagi taraqqiy topgan demokratik davlatlar qatoriga qo‘shish, xalqimiz uchun erkin va farovon jamiyat qurishdan iborat ekan, bu boradagi eng katta mas’uliyat Siz — fidoyi o‘qituvchi va murabbiylar qo‘lidadir.” – deyiladi O‘zbekiston Respublikasi Xalq ta’limi vaziri Baxtiyor Saidovning telegram kanalida.

• Maktab
• O‘qituvchi
• Universitet
• Xalq ta'limi vazirligi